ممبئی، 09 نومبر : ٹیلی ویژن اداکار نتن سنگھ عرف چوہان نے ممبئی کے مضافاتی علاقے گوریگاؤں میں واقع اپنی رہائش گاہ پر مبینہ طور پر خودکشی کرلی۔ رپورٹ کے مطابق 35 سالہ اداکار نیتن چوہان رئیلیٹی شو ’داداگیری‘ کے دوسرے سیزن کے فاتح، ’ایم ٹی وی اسپلٹز ولا‘ اور ’کرائم پیٹرول‘ میں اداکاری کے لیے مشہور تھے۔ دین دوشی پولیس ذرائع نے ہفتہ کو بتایا کہ چوہان اپنی بیوی اور بیٹی کے ساتھ یہاں رہتا تھا اور کام نہ ملنے کی وجہ سے وہ انتہائی ذہنی دباؤ میں تھا۔ انہوں نے بتایا کہ جب چوہان کی بیوی اور بیٹی گھر سے باہر تھیں تو اس نے مبینہ طور پر چھت کے پنکھے سے رسی سے پھندا لگا کر خودکشی کر لی۔ بعد میں جب اس کے گھر والے وہاں پہنچے تو انہوں نے چوہان کو پنکھے سے لٹکا ہوا پایا۔ گھر والوں نے فوری طور پر پولیس کو اطلاع دی۔ اسے ہسپتال لے جایا گیا، جہاں اسے مردہ قرار دے دیا گیا۔ ابتدائی تحقیقات سے پتہ چلا ہے کہ چوہان ٹی وی سیریل اور فلموں میں کردار نہ ملنے کی وجہ سے ذہنی مسائل کا شکار تھا۔ نیتن چوہان کی موت کی خبر سن کر ان کے دوستوں اور ساتھیوں نے سوشل میڈیا پر افسوس اور تعزیت کا اظہار کیا ہے۔ View this post on Instagram A post shared by Viral Bhayani (@viralbhayani) ویبھوٹی ٹھاکر نے انسٹاگرام پر ایک بلیک اینڈ وائٹ تصویر کے ساتھ لکھا، ’میرے عزیز، سکون میں رہو (RIP)، میں واقعی حیرت زدہ اور غمگین ہوں، کاش تم میں تمام مشکلات کا سامنا کرنے کی طاقت ہوتی، کاش تم اپنے جسم کی طرح ذہنی طور پر مضبوط ہوتے‘۔ٹی وی اداکار سدھیپ سہیر نے بھی انسٹاگرام اسٹوری پر نیتن کی تصویر شیئر کرتے ہوئے لکھا، ’سکون میں رہو (RIP)، دوست‘۔ ویبھوٹی اور سدھیپ نے نیتن کے ساتھ ’تیرا یار ہوں میں‘ کام کیا تھا، نتن کو آخری مرتبہ اس ہی ڈرامے میں 2022 میں دیکھا گیا تھا جس کے بعد وہ اسکرین سے اوجھل ہوگئے تھے۔ یاد رہے کہ نیتن کا تعلق اتر پردیش کے علی گڑھ سے تھا۔ انہیں ٹی وی انڈسٹری میں پہلا بریک تھرو 2009 میں رئیلیٹی شو ’داداگیری 2‘ میں کامیابی حاصل کر کے ملا۔ نیتن نے ’ایم ٹی وی اسپلٹز ولا‘ کے پانچویں سیزن سمیت ’زندگی ڈاٹ کام‘ اور ’کرائم پیٹرول‘ جیسے دیگر شوز میں بھی کام کر کے شہرت کمائی۔ اداکار کے انسٹاگرام اکاؤنٹ سے پتہ چلتا ہے کہ وہ فٹنس کے شوقین تھے۔

Source: social media