کراچی شہر میں کورونا سے 4 ہلاکتوں کے بعد طبی ماہرین نے خطرے کا عندیہ دے دیا۔ نجی ٹی وی کی رپورٹ کے مطابق کراچی جیسے گنجان آباد اور متحرک شہر میں جہاں زندگی ہمہ وقت رواں دواں رہتی ہے، ایک بار پھر کورونا وائرس نے اپنی موجودگی کا سنگین احساس دلایا ہے۔ حالیہ اطلاعات کے مطابق کراچی میں مہلک وائرس کے باعث کم از کم 4افراد جان کی بازی ہار چکے ہیں۔ یہ اموات ایسے وقت میں رپورٹ ہوئیں ہیں جب ملک بھر میں عمومی طور پر کورونا وائرس کی شدت میں کمی سمجھی جا رہی تھی،مگر موسم گرما کے دوران یہ نیا اضافہ طبی ماہرین اور عوام دونوں کے لیے پریشانی کا باعث بن گیا ہے۔ یہ چاروں اموات شہر کے ایک معروف نجی اسپتال میں ریکارڈ کی گئی ہیں، جہاں گزشتہ چند دنوں میں کورونا سے متاثرہ مریضوں کی آمد میں واضح اضافہ دیکھنے میں آیا ہے۔ جاں بحق ہونے والے تمام افراد عمر رسیدہ تھے اور انہیں پہلے سے مختلف نوعیت کی طبی پیچیدگیاں لاحق تھیں، جن میں بالخصوص کمزور مدافعتی نظام نمایاں تھا۔ یہی عوامل ان کی صحت کو مزید کمزور کرنے اور وائرس کے مہلک اثرات سے نمٹنے کی صلاحیت کو محدود کرنے کا سبب بنے۔ ماہرین کا کہنا ہے کہ اگرچہ ویکسینیشن کی بدولت بڑی تعداد میں لوگوں کو وائرس سے تحفظ حاصل ہوا ہے، تاہم وقت گزرنے کے ساتھ ساتھ ویکسین کی افادیت میں کمی واقع ہو سکتی ہے، خاص طور پر ان افراد میں جو بوسٹر ڈوز حاصل نہیں کر پائے۔ اس کے علاوہ کئی افراد ایسے بھی ہیں جنہوں نے ابتدائی ویکسینیشن تو کروالی لیکن احتیاطی تدابیر کو مکمل طور پر ترک کر دیا، جس کا نتیجہ اب سامنے آ رہا ہے۔ ماہرین صحت کی جانب سے عوام کو ایک بار پھر احتیاط برتنے کی اپیل کی گئی ہے۔ وہ کہتے ہیں کہ ہمیں یہ نہیں بھولنا چاہیے کہ کورونا وائرس مکمل طور پر ختم نہیں ہوا بلکہ یہ اب ایک مستقل حقیقت بن چکا ہے، جو وقتاً فوقتاً اپنی موجودگی کا احساس دلاتا رہے گا۔ اگرچہ اس بار کی لہر ماضی کی لہروں کی طرح وسیع پیمانے پر نقصان دہ دکھائی نہیں دیتی، لیکن معمر اور کمزور مدافعتی نظام رکھنے والے افراد کے لیے یہ بدستور جان لیوا ثابت ہو سکتی ہے۔

Source: social media