کولمبیا میں 6.3 شدت کے زلزلے سے درجنوں گھر ملبے کا ڈھیر بن گئے۔ زلزلہ کے باعث سڑکوں پر دراڑیں پڑ گئیں۔ غیر ملکی ذرائع ابلاغ کے مطابق زلزلہ کولمبیا کے دارالحکومت بوگوٹا سے تقریباً ایک سوستر کلومیٹر مشرق میں آیا۔ جسے ملک کے بیشترحصوں میں محسوس کیا گیا۔ تاہم کسی جانی نقصان کی اطلاع سامنے نہیں آئی۔ خبر رساں ایجنسی ’اے ایف پی‘ کا اپنی رپورٹ میں کہنا ہے کہ صبح 8:08 بجے دارالحکومت بوگوٹا سے تقریباً 170 کلومیٹر (105 میل) مشرق میں شدید زلزلہ آیا جسے ملک کے بیشتر حصوں میں محسوس کیا گیا۔ امریکی جیولوجیکل سروے کا اس حوالے سے کہنا ہے کہ زلزلہ پیراٹیبوینو کے قریب 9 کلومیٹر (5.5 میل) کی گہرائی میں آیا۔ اس کا اثر بحر الکاہل کے ساحل کے قریب میڈلین اور کیلی تک محسوس کیا گیا۔ رپورٹس کے مطابق جزوی طور پر منہدم ہونے والی کئی عمارتوں کو دیکھا گیا ہے، جن میں ایک سفید رنگ کا چرچ بھی شامل ہے جس کی ایک دیوار کو شدید نقصان پہنچا۔ حکام کئی دیگر دیہاتوں میں معمولی نقصان کی تحقیقات کر رہے ہیں۔ زلزلے سے شدید زخمی ہونے کی کوئی اطلاع نہیں ہے۔ اینڈیز میں واقع اور 80 لاکھ آبادی والے بوگوٹا کے ہزاروں شہری عمارتوں سے نیچے اور باہر بھاگے اور پارکوں اور دیگر کھلی جگہوں پر پناہ لی۔ ’ایکس‘ پر بوگوٹا کے سیکیورٹی ڈپارٹمنٹ کا کہنا تھا کہ ہنگامی کارکن نقصان کا پتا لگانے اور مدد فراہم کرنے کے لیے شہر کا جائزہ لے رہے ہیں۔ بوگوٹا کے میئر کارلوس فرنینڈو گالان کا کہنا ہے کہ تمام ڈیزاسٹر ایجنسیوں کو فعال کر دیا گیا ہے۔ کولمبیا کے علاوہ برازیل، ایکویڈور اور وینزویلا میں بھی زلزلے کو محسوس کیا گیا۔ یاد رہے کہ وسطی کولمبیا شدید زلزلے کی سرگرمیوں کے زون میں ہے۔ 1999 میں یہاں 6.2 شدت کے زلزلے میں تقریباً 1200 افراد لقمہ اجل بن گئے تھے۔

Source: social media