International

آبنائےہرمز کو امریکی علاقہ قرار دینا ٹرمپ کا وہم ہے، ایران

19/08/26

نائب ایرانی وزیرخارجہ کاظم غریب آبادی کا ٹرمپ کی آبنائے ہرمز سے متعلق پوسٹ پر ردعمل آگیا۔

نائب ایرانی وزیرخارجہ نے ردعمل میں کہا کہ آبنائے ہرمز سے متعلق سوشل میڈیا پر لکھا ٹرمپ کا وہم جلد دور ہو جائے گا، ٹرمپ کا وہم ختم ہو گا یا ہم اسےختم کریں گے۔

امریکی صدر ڈونلڈ ٹرمپ نے آبنائے ہرمز کو امریکی علاقہ قرار دے کر نیا نقشہ شیئر کر دیا۔

صدر ٹرمپ نےٹروتھ سوشل پر آبنائے ہرمز کا نقشہ شیئر کیا جس پر ’’نیا امریکی علاقہ‘‘ درج ہے۔ نقشے کی تصویر میں اسٹریٹجک آبی گزرگاہ کے گرد ایک دائرہ شامل ہے جو خلیج عرب کے داخلی راستے پر ایران اور عمان کے درمیان واقع ہے، اس علاقے پر "نیو یو ایس ٹیریٹری” کے الفاظ دکھائے گئے ہیں۔

صدر کی سوشل پوسٹ ایک دن بعد سامنے آئی جب انہوں نے کہا کہ آبنائے کو امریکی علاقہ قرار دینا ایک "بہت اچھا خیال” تھا۔

اوول آفس میں صحافیوں نے جب ان سے پوچھا کہ پچھلے ہفتے ان کا کیا مطلب تھا جب انہوں نے کہا کہ وہ جلد ہی آبنائے کو امریکی علاقہ قرار دیں گے تو ٹرمپ نے کہا کہ”میرا مطلب ہے کہ ہم اسے کنٹرول کرتے ہیں،”

صدر نے مزید کہا کہ "ہم اسے ناکہ بندی کے ذریعے کنٹرول کرتے ہیں، اور مجھے اسے ایک علاقہ قرار دینے کا خیال پسند ہے۔”

Source: Admin