متحدہ عرب امارات نے منگل کے روز ایران پر الزام عائد کیا کہ اس نے اس کی سرزمین کی جانب دو بیلسٹک میزائل داغے، تاہم ان میں سے کوئی بھی خشکی پر نہیں گرا۔
خبر رساں ادارے اے ایف پی کے مطابق وزارت کی جانب سے ایکس پر جاری کیے گئے بیان میں کہا گیا ہے کہ ’متحدہ عرب امارات کے فضائی دفاعی نظام نے ایران سے ملک کی جانب داغے گئے دو بیلسٹک میزائلوں کا سراغ لگایا۔ پہلا میزائل ملک کی علاقائی حدود سے باہر سمندر میں گرا، جبکہ دوسرا علاقائی سمندری حدود کے اندر گرا۔‘
وزارت نے کہا کہ وہ کسی بھی خطرے سے نمٹنے کے لیے تیار ہے۔
یہ بیان ممکنہ میزائل خطرات کے حوالے سے جاری کیے گئے ایک مختصر فون الرٹ کے تقریباً دو گھنٹے بعد سامنے آیا۔ وزارتِ دفاع نے تصدیق کی تھی کہ کئی ماہ بعد پہلی مرتبہ اس نے ملک کی جانب آنے والے میزائلوں کا سراغ لگایا ہے۔
وزارتِ داخلہ نے فون الرٹ میں کہا کہ ’موجودہ صورتحال اور ممکنہ میزائل خطرات کے پیش نظر فوری طور پر قریبی محفوظ عمارت میں محفوظ مقام پر چلے جائیں۔ یہ الرٹ کچھ ہی دیر بعد ختم کر دیا گیا۔
یہ جون میں جاری کیے گئے ایک غلط انتباہ اور جولائی میں ایک ایسے حملے کے حوالے سے جاری کیے گئے الرٹ کے بعد اپنی نوعیت کا پہلا انتباہ تھا، جو بالآخر متحدہ عرب امارات کی حدود میں داخل نہیں ہوا تھا۔ اس سے قبل آخری میزائل وارننگ مئی کے اوائل میں جاری کی گئی تھی۔
اماراتی وزارتِ دفاع نے کہا کہ اس نے ملک کی جانب آنے والے میزائل خطرے کا سراغ لگایا ہے۔
سرکاری ملکیتی تیل کمپنی اے ڈی این او سی سے تعلق رکھنے والے آئل ٹینکرز کو گزشتہ چند ہفتوں کے دوران بار بار نشانہ بنایا گیا ہے۔
28 فروری کو مشرقِ وسطیٰ میں جنگ شروع ہونے کے وقت متحدہ عرب امارات ایران کے حملوں سے سب سے زیادہ متاثر ہوا، جب تقریباً 3,000 میزائل اور ڈرون ملک کی جانب بھیجے گئے، جو خطے کے کسی بھی دوسرے ملک کے مقابلے میں زیادہ تھے۔

Source: Admin