جنوبی لبنان میں حزب اللہ کے ٹھکانوں پر اسرائیلی فضائی حملوں میں دو زخمی

بیروت/یروشلم، 15 اگست : اسرائیلی جنگی طیاروں اور ڈرونز نے جمعرات کی رات جنوبی لبنان میں حزب اللہ کے ٹھکانوں پر متعدد فضائی حملے کیے، جن میں دو افراد زخمی ہو گئے۔ لبنان کی سرکاری خبر رساں ایجنسی کے مطابق ایک اسرائیلی ڈرون نے جنوبی لبنان کے وسطی علاقے کے عیترون گاؤں میں ایک موٹرسائیکل پر دو میزائل داغے۔ لبنان کی وزارت صحت نے بتایا کہ اس حملے میں دو افراد زخمی ہوئے ہیں۔ اسرائیلی طیاروں کا ہدف گاؤں کا ایک میونسپلٹی پولیس افسر تھا۔ دوسری جانب اسرائیلی فوج نے کہا کہ اس نے جنوبی لبنان پر حملہ کیا اور حزب اللہ کی زیرِ زمین سرنگوں کو نشانہ بنایا۔ فوج نے عہد کیا ہے کہ اسرائیل کے خلاف کسی بھی قسم کے خطرے سے نمٹنے کے لیے کارروائی جاری رکھی جائے گی۔ قابلِ ذکر ہے کہ اسرائیل اور حزب اللہ کے درمیان 14 ماہ کی لڑائی کے بعد 27 نومبر 2024 کو جنگ بندی کا آغاز ہوا تھا۔ بدھ کے روز فوج کے سربراہ ایال زامیر نے کہا کہ جنگ بندی کے بعد سے اسرائیلی حملوں میں 240 سے زائد دہشت گرد مارے جا چکے ہیں اور تقریباً 600 حملے کیے گئے ہیں۔

Source: uni urdu news service