گوہاٹی: آسام کے اضلاع شیو ساگر اور چرائیدیو میں پڑوسی ریاست ناگالینڈ کی پہاڑیوں سے آنے والے سیلابی ریلوں نے بے مثال تباہی مچا دی ہے۔ سیلاب کی شدت کا اندازہ اس بات سے لگایا جا سکتا ہے کہ پورے کے پورے گاؤں رابطہ سڑکوں سے کٹ چکے ہیں، جبکہ بے گھر افراد چھتوں اور درختوں پر پناہ لینے پر مجبور ہیں۔ "ہم نے کچھ نہیں کھایا، پتے کھا رہے ہیں" — المناک وائرل ویڈیو نذیرا شہر سے تقریباً 4 کلومیٹر دور ہلانگ کٹونی گاؤں سے سامنے آنے والی ایک دردناک ویڈیو اس وقت ملک بھر میں تباہی کی علامت بن چکی ہے۔ ویڈیو میں ایک اسکول کا بچہ اپنے سیلاب زدہ اسکول کیمپس کے پاس ایک درخت پر اپنی ماں اور دیگر افراد کے ساتھ رات بھر چمٹا رہا۔ درخت کے ایک پتے کو ہاتھ میں تھامے اس کمسن بچے نے بے بسی کی حالت میں کہا: "ارے لوگو! ہم نے کچھ نہیں کھایا، اب پتے کھانے پر مجبور ہیں۔" بچے کے ساتھ درخت پر پناہ گزین خاندان کے دیگر افراد نے بتایا کہ انہوں نے طوفانی بارش اور سیلابی پانی کے درمیان پوری رات اسی درخت پر گزاری ہے۔ ایک متاثرہ شخص نے بتایا، "ہمارے گھر مکمل طور پر پانی میں ڈوب چکے ہیں، شدید سردی اور بارش کی وجہ سے لوگ بیمار ہو رہے ہیں۔" ٹین کی چھتوں تک پہنچا پانی، صورتحال انتہائی نازک پیر کی صبح سامنے آنے والی مناظر میں دیکھا جا سکتا ہے کہ سیلاب کا پانی گھروں کی ٹین کی چھتوں تک پہنچ چکا ہے اور آس پاس کے تمام علاقے مکمل طور پر جل تھل ہو چکے ہیں۔ اس المناک صورتحال پر تشویش کا اظہار کرتے ہوئے نذیرا کے سابق ایم ایل اے اور کانگریس کے سینئر رہنما دیببرتا سائکیا نے سوشل میڈیا پر اپنے پیغام میں علاقے کی صورتحال کو "خوفناک" اور "انتہائی نازک" قرار دیا ہے، اور انتظامیہ سے فوری امدادی کارروائیوں کا مطالبہ کیا ہے۔ آسام کے سیلاب نے ہزاروں خاندانوں کو بے گھر کر دیا ہے، اور دور دراز علاقوں میں پھنسے لوگوں تک غذائی اجناس اور طبی امداد پہنچانا اس وقت انتظامیہ کے لیے ایک بڑا چیلنج بن چکا ہے۔

Source: Admin