دباو میں آکر استعفیٰ دیا‘، سریندر ناتھ لا کالج کے نائب پرنسپل محمدی ترنم کا دعویٰ
کالج میں طویل عرصے سے شدید بدنظمی کی صورتحال ہے۔ تقریباً ایک دہائی سے جاری اس افراتفری کے پیچھے خود کالج کے وائس پرنسپل یا نائب پرنسپل کے ملوث ہونے کا الزام لگایا جاتا رہا ہے۔ یہ معاملہ جمعرات کی رات شدت اختیار کر گیا، جب سریندر ناتھ لا کالج کے نائب پرنسپل کا طلبہ نے پوری رات گھیراو کیے رکھا۔ بالآخر جمعہ کی دوپہر نائب پرنسپل محمدی ترنم نے استعفیٰ دے دیا۔ تاہم میڈیا سے گفتگو کرتے ہوئے انہوں نے دعویٰ کیا کہ انہوں نے دباو میں آکر استعفیٰ دیا ہے، اپنی مرضی سے نہیں۔ نائب پرنسپل کے اس دعوے کے بعد طالبات نے دوبارہ شور شرابا شروع کردیا۔ ایک ویڈیو دکھاتے ہوئے انہوں نے دعویٰ کیا کہ محمدی ترنم نے اپنی مرضی سے استعفیٰ دیا ہے۔ مجموعی طور پر، نائب پرنسپل کے استعفیٰ کے باوجود جمعہ کو بھی سریندر ناتھ لا کالج میں تعطل ختم نہیں ہوا۔
تقریباً 10 سال سے محمدی ترنم سریندر ناتھ لا کالج کے وائس پرنسپل کے عہدے پر فائز تھیں۔ انہیں ترنمول کانگریس کے قریبی حلقوں سے وابستہ سمجھا جاتا ہے۔ طلبہ کی جانب سے طویل عرصے سے ان کے خلاف شکایت رہی ہے کہ وہ حاضری سے لے کر کالج کے مختلف معاملات تک انتہائی لاپرواہی کا مظاہرہ کرتی ہیں۔ الزام ہے کہ طلبہ باقاعدگی سے کلاسوں میں حاضر ہونے کے باوجود حاضری رجسٹر میں ان کے نام مناسب طریقے سے درج نہیں کیے جاتے۔ کسی مسئلے کے حل کے لیے وائس پرنسپل سے رجوع کرنے پر بھی کوئی حل نہیں ملتا۔ یہ بھی الزام ہے کہ وہ خود بھی وقت پر کالج نہیں آتیں۔
طلبہ کا الزام ہے کہ وائس پرنسپل محمدی ترنم کے اس غیر سنجیدہ رویے کی وجہ سے طویل عرصے سے کالج میں افراتفری کی صورتحال پیدا ہوگئی ہے اور تعلیمی ماحول بھی متاثر ہوا ہے۔ ان سنگین شکایات کے حل اور نائب پرنسپل کے استعفے کے مطالبے کو لے کر طلبہ نے جمعرات کی شام سے ان کا گھیراو شروع کردیا۔ الزام ہے کہ انہیں کھانے پینے تک کی سہولت نہیں دی گئی۔
جمعہ کی صبح بھی ان کا گھیراو جاری رہا۔ اس کے نتیجے میں دوپہر کے قریب نائب پرنسپل محمدی ترنم نے اپنے عہدے سے استعفیٰ دے دیا۔ انہوں نے یونیورسٹی انتظامیہ کو ای میل کے ذریعے اپنا استعفیٰ بھیجا۔ تاہم میڈیا کے سامنے آکر انہوں نے دعویٰ کیا کہ انہوں نے اپنی مرضی سے نہیں بلکہ طلبہ کے دباو میں آکر استعفیٰ دیا ہے۔
یہ بات سنتے ہی بڑی تعداد میں طالبات نے سخت احتجاج کیا۔ ایک ویڈیو دکھاتے ہوئے انہوں نے دعویٰ کیا کہ کسی دباو کی وجہ سے نہیں بلکہ محمدی ترنم نے خود اپنی مرضی سے نائب پرنسپل کے عہدے سے استعفیٰ دیا ہے۔ ویڈیو میں ترنم کو یہ کہتے ہوئے دیکھا جاسکتا ہے کہ وہ اپنی مرضی سے استعفیٰ دے رہی ہیں۔ اس طرح بار بار اپنا بیان تبدیل کیے جانے کے باعث سریندر ناتھ لا کالج میں تعطل کی صورتحال اب بھی برقرار ہے۔