24 گھنٹوں میں دوسری بار کولکاتا ایئرپورٹ پر بم کی دھمکی
کولکاتا ایئرپورٹ پر ایک بار پھر بم کی دھمکی سے خوف و ہراس پھیل گیا! فوکٹ سے آنے والے طیارے کے بیت الخلا کے آئینے پر ’BOMB INSIDE AIRCRAFT‘ یعنی ’طیارے کے اندر بم ہے‘ لکھا ہوا ملا۔ ایئرپورٹ ذرائع کے مطابق، ہفتے کے روز فوکٹ سے کولکاتا پہنچنے والے ایک طیارے کے اترنے کے بعد جب کیبن کریو کے ارکان بیت الخلا کی صفائی کرنے گئے تو انہوں نے آئینے پر طیارے کے اندر بم رکھے ہونے کی دھمکی لکھی دیکھی۔
فوری طور پر اس معاملے کی اطلاع پائلٹ اور ایئرپورٹ کے سکیورٹی افسران کو دی گئی۔ چند ہی لمحوں میں طیارے کو آئسولیشن بے میں منتقل کردیا گیا۔ مسافروں کو بحفاظت اتارنے کے بعد سی آئی ایس ایف، بم اسکواڈ اور ایئرپورٹ پولیس نے تلاشی شروع کردی۔ تاہم، طویل وقت تک تلاشی لینے کے باوجود طیارے کے اندر سے کوئی مشتبہ چیز برآمد نہیں ہوئی۔ ابتدائی طور پر شبہ ظاہر کیا جارہا ہے کہ کسی نے خوف و ہراس پھیلانے کے مقصد سے یہ حرکت کی ہے۔