کارپوریشن چناﺅ کےلئے امیدواروں کا انتخاب بہت باریکی سے کیا جا رہا ہے: سوکانتو
ایک ماہ گزرتے ہی کولکاتا اور ہاوڑہ میں بلدیاتی انتخابات ہونے والے ہیں۔ ریاست میں اقتدار میں آنے کے بعد ان دونوں میونسپل کارپوریشنوں پر قبضہ کرنا بی جے پی کے لیے ایک بڑا چیلنج ہے۔ اگرچہ سیاسی حالات سے واقف حلقوں کی رائے ہے کہ زعفرانی خیمہ آسانی سے یہ چیلنج جیت لے گا، لیکن حکمراں جماعت احتیاط سے کام لے رہی ہے۔ بی جے پی طویل عرصے سے اپنی تنظیم کو مضبوط بنانے اور مرحلہ وار تیاری کرنے میں مصروف ہے۔ ہفتے کے روز اس سلسلے میں ہونے والی میٹنگ کے بعد پریس کانفرنس میں کولکاتا بلدیاتی انتخابات کے لیے پارٹی کے انچارج سکانتا مجمدار نے اپنی حکمت عملی کافی حد تک واضح کر دی۔ انہوں نے بتایا کہ امیدواروں کی فہرست میں ’بیرونی عناصر‘ کی شمولیت روکنے کے لیے باریک بینی سے جائزہ لینے کے بعد فہرست تیار کی جائے گی۔ انہوں نے پرانے کارکنوں کو ترجیح دینے کی یقین دہانی کرائی، لیکن ساتھ ہی یہ بھی یاد دلایا کہ سیاست امکانات کا ایک لامحدود میدان ہے۔ ان کے اس بیان کے بعد ایک بار پھر بحث شروع ہو گئی ہے۔
2026 کے اسمبلی انتخابات میں ممتا بنرجی کی جماعت کی بدترین شکست کے بعد ایک کے بعد ایک انتظامی شعبہ متاثر ہوا تھا۔ میونسپل کارپوریشنوں، میونسپلٹیوں اور پنچایتوں جیسے مقامی انتظامی اداروں میں استعفوں اور پارٹی چھوڑنے کے واقعات کے باعث اقتدار ہاتھ سے نکل گیا تھا اور یہ ادارے غیر مو¿ثر ہو گئے تھے۔ ترنمول کانگریس کے سابق رہنما اور کارکن بعد میں ’اچھی ترنمول‘ کا حصہ بن کر حکمراں جماعت بی جے پی میں شامل ہو گئے۔ اس صورت حال میں بی جے پی کے پرانے کارکنوں کے ذہنوں میں فطری طور پر سوال اٹھنے لگا کہ کیا بلدیاتی انتخابات میں ان ’پارٹی بدلنے والوں‘ کو ٹکٹ دیا جائے گا؟ کیا اتنے عرصے تک وفاداری کے ساتھ کام کرنے کے باوجود انہیں پیچھے کی صفوں میں جانا پڑے گا؟
پرانے کارکنوں کو یقین دلانے کے لیے سب سے پہلے پارٹی کے ریاستی صدر شَمیک بھٹاچاریہ سامنے آئے تھے۔ انہوں نے واضح طور پر کہا تھا کہ امیدواروں کی فہرست میں کوئی ’بیرونی عنصر‘ شامل نہیں ہوگا۔
لیکن ہفتے کے روز بلدیاتی انتخابات کی تیاری سے متعلق میٹنگ کے بعد کولکاتا میں پارٹی کے انچارج سکانتا مجمدار کے بیان سے یہ ابہام برقرار رہا۔ انہوں نے کہا، ”پارٹی کے پرانے کارکنوں کو ترجیح دی جائے گی، چاہے وہ 10 سال سے پارٹی میں ہوں یا صرف ایک سال سے۔ جو لوگ اس وقت عہدوں پر ہیں یا ماضی میں کسی نہ کسی عہدے پر رہ چکے ہیں، انہیں ترجیح دی جائے گی۔ ہم اس بات کا خیال رکھیں گے کہ پرانے کارکن محروم نہ رہ جائیں۔ چھوٹی سے بڑی، تنظیم کی تمام سطحوں پر سبھی سے بات چیت اور ان کی رائے لینے کے بعد ہی امیدواروں کا انتخاب کیا جائے گا۔ معزز شخصیات سے بھی رائے لی جائے گی۔ اگر وہ چاہیں تو آ سکتے ہیں۔ امیدواروں کے انتخاب کے دوران جیتنے کی صلاحیت اور ان کی شبیہ کا جائزہ لیا جائے گا۔ 25 اکتوبر کی شام 5 بجے تک دلچسپی رکھنے والے امیدوار ہمارے مقررہ ڈراپ باکس میں اپنی درخواستیں جمع کرا سکتے ہیں۔ انتخابات کا اعلان ہونے کے 3 سے 4 دن کے اندر ہم امیدواروں کے ناموں کا اعلان کر دیں گے۔“