بھاجپائیوں نے ٹینگرا میں ایس یو سی آئی کے بک اسٹال پر حملہ، ودیا ساگر کی کتابیں پھینکی گئیں
قانونی رکاوٹیں دور ہونے کے بعد درگا پوجا کے موقع پر ریاست بھر میں سی پی ایم اور دیگر بائیں بازو کی جماعتوں نے بڑی تعداد میں کتابوں کے اسٹال لگائے ہیں۔ لیکن تقریباً ہر جگہ ’مارکسی اور ترقی پسند ادب کے بک اسٹالوں‘ پر حملے اور توڑ پھوڑ کے واقعات پیش آ رہے ہیں۔
جمعرات کو شمالی 24 پرگنہ کے بیج پور، نیاہٹی، نوپاڑہ اور پالتا میں سی پی ایم کے بک اسٹالوں میں توڑ پھوڑ اور آگ لگانے کے الزامات سامنے آئے۔ بائیں بازو کی قیادت نے ان تینوں واقعات کے پیچھے بی جے پی کو ذمہ دار ٹھہرایا ہے۔
دوسری جانب، جمعہ کو ششٹھی کے دن کولکاتا شہر کے کئی مقامات پر سی پی ایم کے بک اسٹالوں پر حملوں کے الزامات سامنے آئے۔ ٹینگرا کے کامارڈانگا میں ایک درگا پوجا پنڈال کے سامنے ایس یو سی آئی کے بک اسٹال پر اچانک حملہ کیا گیا۔ پارٹی کی ریاستی کمیٹی نے ایک تحریری بیان میں یہ اطلاع دی۔
صرف یہی نہیں، ایس یو سی آئی نے یہ الزام بھی لگایا کہ اسٹال میں رکھی ودیا ساگر، کھدی رام اور کامریڈ شیبداس گھوش کے نظریات پر مبنی کتابوں کو پھاڑ کر سڑک پر پھینک دیا گیا۔