ایران کے جوابی میزائل حملے کے بعد اسرائیلی فوج پریس بریفنگ چھوڑ کر بھاگ نکلی۔ ایران کی جانب سے میزائل حملے میں اسرائیلی فوج پریس بریفنگ درمیان میں چھوڑ کر بھاگ نکلی، وارننگ کے سائرن بجتے ہی اسرائیلی فوجی ترجمان نے بریفنگ درمیان میں روک دی۔ اسرائیلی اخبار ہاریٹز کی رپورٹ کے مطابق ایران کے حملے میں وسطی اسرائیل میں 15 افراد زخمی ہوئے ہیں جن میں ایک کو معمولی زخم آئے ہیں۔ ایرانی فوج کا دعویٰ ہے کہ 2 اسرائیلی ایف 16 طیارے اور کئی ڈرونز مار گرائے ہیں۔ الجزیرہ کی رپورٹ کے مطابق اسرائیل نے ایرانی ایئر ڈیفنس سسٹم کی جانب سے 2 طیارے مار گرانے اور خاتون پائلٹ کے گرفتار ہونے کی تردید کردی ہے۔ ایرانی اہلکار نے کہا کہ اسرائیل ہمارے کمانڈروں، سائنسدانوں اور لوگوں کو مارنے کی بھاری قیمت ادا کرے گا۔ اسرائیلی فوج کا کہنا ہے کہ ایران نے اسرائیل پر میزائل کا دوسرا بیراج فائر کردیا ہے۔ ایران نے اسرائیل کے خلاف آپریشن کا نام ’وعدہ صادق 3‘ رکھ دیا ہے، ایرانی پاسداران انقلاب کا کہنا ہے کہ اسرائیلی ظالمانہ حملوں کے جواب میں پوری طرح تیار ہیں۔ پاسداران انقلاب کا کہنا ہے کہ ایرانی قوم کے مطالبے اور حمایت پر کارروائی کا آغاز کیا ہے۔

Source: social media