اسرائیلی افواج نے شمالی غزہ کے شہریوں کو فوری طور پر علاقہ خالی کرنے کے احکامات جاری کر دیے۔ عرب میڈیا کے مطابق اسرائیل کی جانب سے بیت حانون اور شیخ زاہد کے علاقے کے رہنے والوں کو فوری طور پر علاقہ چھوڑنے کے لیے کہا گیا ہے۔ اسرائیل نے اعلان کیا ہے کہ جلد ایک بڑا فوجی حملہ کیا جائے گا۔ دوسری جانب غزہ کی پٹی میں اسرائیل حملوں میں 36 افراد شہید ہوئے ہیں۔ فلسطینی شہری دفاع نے بتایا ہے کہ فضائی حملے سے تباہ ہونے والے 1 گھر میں 6 افراد شہید ہوئے ہیں جن میں میاں بیوی اور ان کے 4 بچے شامل ہیں۔ غزہ میں خدمات انجام دینے والے انڈونیشیائی اسپتال کی انتظامیہ کا کہنا ہے کہ غزہ میں اسرائیلی فورسز نے جبالیہ کے علاقے میں ایک پولیس اسٹیشن کو نشانہ بنایا ہے، اس حملے میں 9 افراد شہید جبکہ متعدد زخمی ہو گئے۔ غزہ میں وزارتِ صحت کی جانب سے بتایا گیا ہے کہ مارچ میں ہونے والے سیز فائر معاہدے کے بعد غزہ میں اسرائیلی حملوں میں تقریباً 2 ہزار شہری شہید ہو چکے ہیں۔

Source: social media