علی پور دوار میں دو دہائیوں بعد سنیما ہال، جمعہ سے سنگل اسکرین سنیما کا آغاز
فلموں کے شائقین کے لیے تہوار کے موقع پر خوشخبری ہے۔ تقریباً دو دہائیوں کے بعد مغربی بنگال کے علی پور دوار شہر میں جمعہ کے روز ایک نیا سنگل اسکرین سنیما ہال کھلنے جا رہا ہے۔
مقامی تاجر ارندم گھوش کی اس پہل کے تحت سنیما ہال سووا گنج میں سمکتلا روڈ پر، شہر کے بس ٹرمینس کے سامنے کھولا جائے گا۔
سنیما ہال کے افتتاح کو لے کر مقامی باشندوں میں کافی جوش و خروش ہے، حالانکہ یہ ملٹی پلیکس نہیں ہے۔ مکمل طور پر ایئر کنڈیشنڈ اس ہال میں آرام دہ نشستوں کی تعداد ۱۰۳ ہے۔
ایک وقت تھا جب علی پور دوار میں چار سنیما ہال ہوا کرتے تھے، جن سے متعدد لوگوں کا روزگار وابستہ تھا۔ ان ہالوں کے سامنے کئی دکانیں چلتی تھیں، جبکہ بہت سے لوگ ان سے متعلق کاروبار اور سرگرمیوں کے ذریعے اپنی روزی کماتے تھے۔لیکن گزشتہ تقریباً دو دہائیوں سے شہر میں کوئی سنیما ہال نہیں تھا۔فی الحال شہر کے فلمی شائقین کو بڑی اسکرین پر فلمیں دیکھنے کے لیے کوچ بہار یا فالا کاٹا جانا پڑتا ہے۔
شہر کے باشندے طویل عرصے سے یہاں سنیما ہال کھولنے کا مطالبہ کر رہے تھے۔ انہوں نے ارندم گھوش کی اس پہل کا خیرمقدم کیا ہے۔ یہ اقدام ایسے وقت میں کیا گیا ہے جب شمالی بنگال کے مختلف علاقوں میں سنگل اسکرین سنیما گھروں کو اپنا وجود برقرار رکھنے کے لیے جدوجہد کرنی پڑ رہی ہے۔
ارندم گھوش نے کہا، ”میں نے منافع یا نقصان کے بارے میں نہیں سوچا۔ اپنے نوجوانی کے دنوں میں میں دوستوں کے ساتھ فلمیں دیکھا کرتا تھا۔ لیکن اب شہر میں ایک بھی سنیما ہال نہیں ہے اور لوگوں کو فلمیں دیکھنے کے لیے دوسری جگہوں پر جانا پڑتا ہے۔ یہاں کے فلمی شائقین کی پریشانی کو محسوس کرتے ہوئے میں نے یہ پہل کرنے کا فیصلہ کیا۔ مجھے امید ہے کہ لوگ اس سہولت سے لطف اندوز ہوں گے۔ نشستوں کی پیشگی آن لائن بکنگ کا انتظام بھی کیا گیا ہے۔“شہر کے فلمی شائق سبھرتا سرکار نے بھی اس پیش رفت کا خیرمقدم کیا۔ انہوں نے کہا، ”میرے لیے یہ بہت بڑی خوشخبری ہے۔ اتنے طویل وقفے کے بعد آخرکار شہر میں دوبارہ سنیما ہال کھلنے جا رہا ہے۔ مجھے امید ہے کہ لوگ فلمیں دیکھنے کے لیے کوچ بہار اور فالا کاٹا جانے کے بجائے اسی ہال میں آئیں گے۔“
اس سنیما ہال میں آنے والوں کے لیے ایک کیفے بھی بنایا گیا ہے۔گھوش نے بتایا کہ ہال میں روزانہ پانچ شوز دکھائے جائیں گے اور ہر شو میں الگ فلم پیش کی جائے گی۔افتتاح سے پہلے ہی پہلے دن سہ پہر ۳ بجے اور شام ۶ بجے ہونے والے دو شوز کے تمام ٹکٹ فروخت ہو چکے تھے۔انہوں نے بتایا کہ باقی تین شوز کے لیے بھی چند ٹکٹ دستیاب تھے، لیکن امید ہے کہ اگلے ۲۴ گھنٹوں کے اندر وہ بھی فروخت ہو جائیں گے۔گھوش نے مزید کہا، ”ہم ناظرین کو مختلف زبانوں کی فلمیں دیکھنے کا انتخاب فراہم کریں گے۔ یہاں انگریزی، بنگالی اور ہندی فلمیں دکھائی جائیں گی۔“