دبئی جا کر بسنے کا خواب چکنا چور! دہلی ایئرپورٹ سے فرضی ڈاکٹر سعیدال گرفتار
دبئی فرار ہونے کے باوجود مغربی بنگال کے جعلی ڈاکٹر شیخ سعیدال کی مشکلیں ختم نہیں ہوئیں۔ بیوی کے ساتھ عرب ملک میں مستقل طور پر رہنے کا ان کا خواب ادھورا رہ گیا۔ بیوی کو دبئی لے جانے کے لیے منگل کے روز دہلی پہنچنا ہی ان کے لیے مصیبت بن گیا۔ ایئرپورٹ پر اترتے ہی بردوان کے جعلی ڈاکٹر سعیدال کو پولیس نے گرفتار کر لیا۔ انہیں ٹرانزٹ ریمانڈ پر بردوان لانے کے لیے پولیس دہلی پہنچ گئی ہے۔ سعیدال کو جلد ہی عدالت میں پیش کیا جائے گا۔
سعیدال کی جعلی سرگرمیوں کا انکشاف ستمبر کے آغاز میں ہوا تھا۔ بردوان کے نواب ہاٹ علاقے کے ایک نجی نرسنگ ہوم میں فیموسس کی سرجری کے دوران ایک بچے کی موت ہو گئی تھی۔ واقعے کے بعد بچے کے اہل خانہ کی جانب سے علاج میں لاپروائی کا الزام لگایا گیا۔ بچے کی ماں شلپا رائے کو فون پر دھمکی دیے جانے کا الزام بھی سامنے آیا تھا۔ بردوان تھانے کی پولیس نے واقعے کی تفتیش شروع کی۔ اس کے ساتھ ہی محکمہ صحت نے بھی تحقیقات شروع کر دیں۔ اسی دوران انکشاف ہوا کہ سرجری کرنے والا شیخ سعیدال دراصل ڈاکٹر نہیں ہے بلکہ اس کے پاس جعلی ڈگری تھی۔ اس کی معلومات کی بنیاد پر محکمہ صحت نے مزید کئی جعلی ڈاکٹروں کا بھی پتہ لگایا۔
واقعے کے بعد سے ہی سعیدال فرار تھا۔ بعد میں محکمہ صحت نے ’لائف کیئر‘ نامی اس نرسنگ ہوم کو بند کر دیا۔ بردوان تھانے کی پولیس نے نرسنگ ہوم کے دو مالکان کو بھی گرفتار کیا ہے۔
دوسری جانب واقعے کے بعد سعیدال گولاپ باغ موڑ علاقے کی ایک پوش رہائشی عمارت سے ایک نرسنگ ہوم کے مالک کی مدد سے دبئی فرار ہو گیا تھا۔ تاہم وہ اپنی بیوی سے باقاعدگی سے موبائل فون پر رابطے میں تھا۔ اسی رابطے کے ذریعے پولیس کو معلوم ہوا کہ سعیدال دبئی میں موجود ہے۔ سعیدال بار بار موبائل سم تبدیل کرکے اپنی بیوی سے رابطہ کرتا تھا۔ اسی ذریعے سے پولیس کو یہ بھی معلوم ہوا کہ وہ اپنی بیوی کو بھی دبئی لے جا کر وہاں مستقل طور پر بسنا چاہتا ہے۔
ادھر پولیس نے سعیدال کے خلاف لک آو¿ٹ نوٹس جاری کر دیا تھا، لیکن اس سے پہلے ہی جعلی ڈاکٹر دبئی جا چکا تھا۔ وہ ’ویزا آن ارائیول‘ کے ذریعے وہاں رہ رہا تھا۔
شوہر کے ساتھ دبئی میں رہنے کے خواب کے ساتھ سعیدال کی بیوی منگل کے روز دہلی پہنچی۔ سعیدال اسے لینے کے لیے دبئی سے پرواز کے ذریعے دہلی آیا تھا۔ دہلی ایئرپورٹ پر اترتے ہی وہاں کی پولیس نے اسے گرفتار کر لیا۔ اس کی اطلاع مشرقی بردوان ضلع پولیس کو دی گئی۔ بردوان پولیس اسے واپس لانے کے لیے دہلی پہنچ گئی ہے۔ اسے بردوان کی عدالت میں پیش کیا جائے گا۔
سعیدال کی گرفتاری پر پولیس کے کردار کی تعریف کرتے ہوئے متوفی بچے کی ماں شلپا رائے نے کہا، ”میں چاہتی تھی کہ میری طرح کسی اور ماں کی گود خالی نہ ہو۔ ہم پولیس کا شکریہ ادا کرتے ہیں۔ بے حد شکریہ کہ پولیس نے میری بیٹی کے قاتل کو گرفتار کیا۔“