پارک اسٹریٹ کے فٹ پاتھ پر بچے کے لیے دودھ گرم کرنے کے واقعے سے پیدا ہونے والے تنازع کے بعد، مغربی بنگال کے وزیراعلیٰ شبھیندو ادھیکاری نے متاثرہ خاندان کی بحالی کے لیے بڑا قدم اٹھایا ہے۔ منگل کے روز سالٹ لیک میں وزیراعلیٰ کے ’جنتا دربار‘ میں برانگر کے ایم ایل اے سژل گھوش کے ساتھ پہنچنے والی فٹ پاتھ باشندہ سیتا دیوی کو وزیراعلیٰ نے یقین دہانی کرائی کہ انہیں اب فٹ پاتھ پر رہنے کی ضرورت نہیں ہے۔
وزیراعلیٰ شبھیندو ادھیکاری نے سیتا دیوی سے بات چیت کے بعد میونسپل کارپوریشن (پورسبھا) کو فوری طور پر اس خاندان کے لیے رہائش کا انتظام کرنے کی ہدایت دی۔

صحافیوں سے بات کرتے ہوئے وزیراعلیٰ نے کہا:”سیتا دیوی اپنے بچے کو لے کر میرے پاس آئی تھیں۔ میں نے ان سے کہا ہے کہ اب فٹ پاتھ پر رہنے کی ضرورت نہیں، ہم رہنے کا انتظام کر دیں گے۔ فٹ پاتھ رہنے کی جگہ نہیں ہے۔ وہ ہماری حکومت اور بی جے پی پر پورا بھروسہ رکھتی ہیں۔“ اس موقع پر وزیراعلیٰ نے ماضی کی بائیں بازو (لیفٹ) اور ترنمول کانگریس کی حکومتوں کو سخت تنقید کا نشانہ بناتے ہوئے کہا کہ جو لوگ آج سوشل میڈیا پر ہمدردی کا مظاہرہ کر رہے ہیں اور نظم و شعر لکھ رہے ہیں، انہوں نے پچھلے ۵۰ سالوں میں اس غریب خاندان کی خبر کیوں نہیں لی؟

چند روز قبل پارک اسٹریٹ کے فٹ پاتھ پر سیتا دیوی اپنے پوتے کے لیے دودھ گرم کر رہی تھیں۔ سڑک پر خطرے کے پیش نظر میونسپل کارپوریشن کی وزیر اگنی مترا پال نے انہیں ایسا کرنے سے روکا اور دودھ گرم کرنا بند کروایا۔
اس واقعے کی ویڈیو وائرل ہونے کے بعد اپوزیشن اور عوامی حلقوں نے اگنی مترا پال کے رویے پر سوال اٹھائے۔ ویڈیو کے وائرل ہونے کے بعد اگنی مترا پال نے کہا کہ ”کسی بچے کے منہ سے دودھ نہیں چھینا گیا بلکہ خطرے کے پیش نظر جگہ خالی کرنے کو کہا گیا تھا۔ شاید مجھے اور نرمی سے بات کرنی چاہیے تھی“۔
سابق وزیراعلیٰ ممتا بنرجی نے فیس بک لائیو کے ذریعے اس واقعے پر شدید غصے کا اظہار کیا اور خاندان کو اپنے کسی کارکن کے گھر ٹھہرانے اور بچے کی تعلیم کا خرچ اٹھانے کی پیشکش کی۔
وزیراعلیٰ شبھیندو ادھیکاری نے ممتا بنرجی کے بیان پر طنز کرتے ہوئے سوال کیا تھا کہ وہ خاندان کو کسی کارکن کے گھر کے بجائے اپنے گھر میں کیوں نہیں رکھتیں؟ اور بالآخر منگل کو حکومت نے خود اس خاندان کی سرپرستی کا اعلان کر دیا۔