مغربی بنگال میں زچگی کے دوران ماؤں کی اموات کی شرح میں تشویشناک اضافے پر ریاستی حکومت کی حالیہ رپورٹ کے بعد ایک نیا سیاسی اور سماجی تنازع کھڑا ہو گیا ہے۔ ریاستی وزیر صحت ڈاکٹر شارودوت مکھوپادھیائے کی جانب سے ”دو بچوں کی پالیسی“، کم عمری کی شادی اور بعض اضلاع میں ۱۳ ویں اور ۱۴ ویں بچے کی ولادت پر اموات کا حوالہ دیے جانے کے بعد جہاں انتظامیہ نے آگاہی مہم کا خاکہ تیار کیا ہے، وہیں آشا ورکرز یونین، ماہرینِ سماجیات اور اپوزیشن کی جانب سے اس کا شدید محاسبہ کیا جا رہا ہے۔

وزیر صحت کے مطابق، ریاست میں ۱۲ سال کی عمر میں ماؤں کے بننے اور ۱۴ ویں بچے کی پیدائش کے دوران اموات جیسے ہولناک واقعات سامنے آئے ہیں۔ حکومت نے اس سے نمٹنے کے لیے درج ذیل اقدامات کا اعلان کیا ہے:

ہاٹ اسپاٹ اضلاع: مرشد آباد (سوتی-۱، سوتی-۲، شمشیر گنج)، مالدہ اور مغربی مدنی پور میں کم عمری کے حمل کو روکنے کے لیے خصوصی نگرانی کی جائے گی۔
اقلیتی علاقوں میں مقامی نمائندے: اقلیتی اکثریتی اضلاع میں اسی برادری سے تعلق رکھنے والے ڈاکٹروں، مقامی معززین اور صحافیوں کو مہم میں شامل کیا جائے گا۔
ڈسٹرکٹ مجسٹریٹس کو ہدایات: کم عمری کی شادیوں کو روکنے کے لیے ضلع حکام کو پہلے سماجی کونسلنگ اور پھر قانونی کارروائی (FIR) کرنے کی ہدایت دی گئی ہے۔

وزیر صحت اور بی جے پی کی جانب سے اقلیتی طبقے میں زیادہ بچوں کی پیدائش کی طرف اشارہ کیے جانے پر پشچم بنگال آشا کرمی یونین کی ریاستی سکریٹری عصمت آرا خاتون نے سخت تنقید کی ہے.

”تاریخ اٹھا کر دیکھ لیں، ربندر ناتھ ٹیگور ہوں، نریندر مودی ہوں یا موجودہ وزیر کلیتا ماجھی — سبھی کے کئی بہن بھائی رہے ہیں۔ کثیر بچوں کا تعلق غربت، ناخواندگی اور شعور کی کمی سے ہے، نہ کہ کسی مخصوص مذہب سے۔ آٹھ بہن بھائیوں کے خاندان سے آنے کے باوجود میری صرف ایک بیٹی ہے۔ آج مسلم کمیونٹی میں بھی ایک یا دو بچوں کا ہی رواج ہے۔ سرکاری ہسپتالوں کی زبوں حالی اور ناکام بنیادی ڈھانچے سے توجہ ہٹانے کے لیے مسلمانوں کو نشانہ بنایا جا رہا ہے۔“ — عصمت آرا خاتون، سکریٹری پشچم بنگال آشا کرمی یونین

Source: Admin