57 سالہ ارباز خان اور شورا خان کے گھر بیٹی کی پیدائش

بالی ووڈ کے 57 سالہ پروڈیوسر اور اداکار ارباز خان اور 35 سالہ میک اپ آرٹسٹ شورا خان والدین بن گئے۔ میڈیا کے مطابق گزشتہ روز شورا خان کو ممبئی کے ایک اسپتال میں داخل کروایا گیا تھا، جہاں انہوں نے اپنی پہلی اولاد کو جنم دیا۔ اس موقع پر ارباز خان اپنی اہلیہ شورا کے ساتھ موجود تھے، ان کے اسپتال پہنچنے کی ویڈیوز سوشل میڈیا پر گردش کر رہی تھیں۔ یہ خوش خبری ایسے وقت میں سامنے آئی ہے جب چند ہفتے قبل ہی ارباز اور شورا کے اہلِ خانہ نے اُن کے لیے ایک سادہ مگر پُرمسرت بے بی شاور تقریب منعقد کی تھی۔ ارباز خان کی شورا خان سے شادی 24 دسمبر 2023ء کو ممبئی میں بہن ارپتا کے گھر ہوئی جس میں خان فیملی اور قریبی دوستوں نے شرکت کی تھی۔ بعد ازاں ایک انٹرویو میں ارباز نے اس بات کی تصدیق کی تھی کہ وہ اور شورا خان والدین بننے والے ہیں۔ یہ ارباز خان کے لیے باپ بننے کا دوسرا موقع ہے، ان کی پہلی شادی اداکارہ ملائیکہ اروڑا سے 1998ء میں ہوئی تھی، جو 20 سال بعد ختم ہوئی، اس شادی سے ان کے ایک بیٹے ارہان خان ہیں جو اب 22 سال کے ہو چکے ہیں۔

Source: Social media