یومِ جمہوریہ کے موقع پر صدر دروپدی مرمو کا قوم سے خطاب: خود انحصاری اور سوَدیشی بھارت کے معاشی مستقبل کی بنیاد

نئی دہلی: صدر جمہوریہ ہند دروپدی مرمو نے اتوار کے روز یومِ جمہوریہ کی 77ویں سالگرہ کے موقع پر قوم سے خطاب کرتے ہوئے کہا کہ ’آتم نربھرتا‘ (خود انحصاری) اور ’سوَدیشی‘ بھارت کے معاشی مستقبل کی تشکیل کے لیے رہنما اصول ہیں۔ انہوں نے کہا کہ ملک کے نوجوان، کاروباری افراد، کھلاڑی، سائنسدان اور پیشہ ور افراد بھارت کو نئی توانائی فراہم کر رہے ہیں اور عالمی سطح پر اپنی شناخت قائم کر رہے ہیں۔ صدر جمہوریہ نے کہا کہ بھارت دنیا کی سب سے بڑی نوجوان آبادی والا ملک ہے اور یہاں کے نوجوانوں میں بے پناہ صلاحیت موجود ہے۔ انہوں نے زور دیا کہ نوجوانوں کی امنگوں پر مبنی پالیسیاں اور پروگرام ملک کی ترقی کو نئی رفتار دیں گے اور وِکست بھارت 2047 کے ہدف کے حصول میں نوجوان کلیدی کردار ادا کریں گے۔ صدر مرمو نے اپنے خطاب میں آئینِ ہند کی اہمیت کو اجاگر کرتے ہوئے کہا: “ہمارا آئین دنیا کی تاریخ کی سب سے بڑی جمہوریت کی بنیادی دستاویز ہے۔ آئین میں شامل انصاف، آزادی، مساوات اور اخوت کے اصول ہماری جمہوریت کی پہچان ہیں۔ آئین سازوں نے آئینی دفعات کے ذریعے قوم پرستی اور قومی یکجہتی کی مضبوط بنیاد فراہم کی۔” انہوں نے سردار ولبھ بھائی پٹیل کو خراجِ عقیدت پیش کرتے ہوئے کہا کہ انہوں نے بھارت کو متحد کیا۔ صدر مرمو نے بتایا کہ گزشتہ سال 31 اکتوبر کو قوم نے سردار پٹیل کی 150ویں یومِ پیدائش جوش و خروش سے منائی اور ان سے متعلق تقریبات آج بھی قومی اتحاد اور فخر کے جذبے کو مضبوط کر رہی ہیں۔ صدر جمہوریہ نے یہ بھی بتایا کہ گزشتہ سال 7 نومبر سے ’وندے ماترم‘ کی تخلیق کے 150 سال مکمل ہونے کی مناسبت سے ملک بھر میں تقریبات منعقد کی جا رہی ہیں۔ انہوں نے کہا کہ یہ قومی نغمہ بھارت ماتا کے لیے ایک دعا ہے جو ہر ہندوستانی کے دل میں حب الوطنی کا جذبہ بیدار کرتا ہے۔ انہوں نے عظیم شاعر سبرامنیا بھارتی، بنگال کے بنکم چندر چٹرجی اور سری اروِندو کی خدمات کا بھی ذکر کیا۔ صدر مرمو نے نیتاجی سبھاش چندر بوس کو یاد کرتے ہوئے کہا کہ ان کا نعرہ ’جے ہند‘ قومی فخر کا اعلان ہے۔ انہوں نے بتایا کہ نیتاجی کی یومِ پیدائش کو 2021 سے ’پراکرَم دیوس‘ کے طور پر منایا جا رہا ہے تاکہ نوجوان ان کی بے مثال حب الوطنی سے تحریک حاصل کر سکیں۔

Source: Swcial Media