ہمیں انصاف چاہیے‘! دہلی میں گیانیش کے خلاف بیان دیتے ہوئے ممتا کی زبان پر آر جی کر تحریک کا وہی نعرہ
تقریباً دو سال پہلے کولکاتا کی سڑکوں اور گلیوں میں جس نعرے کی گونج سنائی دیتی تھی، جس کے تین الفاظ نے ان کی نیند اڑا دی تھی، پیر کی دوپہر مغربی بنگال کی سابق وزیر اعلیٰ ممتا بنرجی کی زبان پر وہی نعرہ سنائی دیا۔ دہلی میں اپوزیشن اتحاد ’انڈیا‘ کے سپریم کورٹ تک مارچ سے قبل صحافیوں سے گفتگو کرتے ہوئے انہوں نے یہ بات کہی۔
ملک کے چیف الیکشن کمشنر گیانیش کمار کے استعفے اور ووٹر لسٹ کی خصوصی جامع نظرثانی (ایس آئی آر) کو منسوخ کرنے کے مطالبے پر اپوزیشن جماعتوں نے کناٹ پلیس سے سپریم کورٹ تک مارچ کرنے کا اعلان کیا ہے۔ اس مارچ میں راہل گاندھی سمیت کانگریس کے رہنماو¿ں کے ساتھ ممتا بنرجی کی پارٹی کے ارکان پارلیمنٹ بھی شامل ہوں گے۔ اس کے علاوہ راشٹریہ جنتا دل (آر جے ڈی) اور سماجوادی پارٹی کے نمائندوں کی بھی مارچ میں شرکت متوقع ہے۔
پروگرام شروع ہونے سے قبل گاڑی میں موجود ممتا بنرجی سے جب صحافیوں نے سوالات کیے تو انہوں نے کہا کہ ان کا احتجاج انسانیت کے مفاد میں ہے۔ وہ انصاف چاہتی ہیں۔ ممتا نے کہا، ”یہ انسانیت کے لیے اور انصاف کے لیے ہے۔ ہم انصاف چاہتے ہیں۔ لوگوں کو حقِ رائے دہی سے محروم کیا گیا ہے۔ ہمیں انصاف چاہیے (وی وانٹ جسٹس)۔ بس، اور کچھ نہیں۔“
واضح رہے کہ 9 اگست 2024 کو کولکاتا کے آر جی کر میڈیکل کالج و اسپتال میں ڈیوٹی پر موجود ایک خاتون ڈاکٹر کے ساتھ مبینہ عصمت دری اور قتل کے واقعے نے پوری ریاست میں ہلچل مچا دی تھی۔ اس واقعے کے خلاف شہری سماج کے لوگ شہر بھر کی سڑکوں پر اتر آئے تھے۔ اس تحریک کا بنیادی نعرہ ’وی وانٹ جسٹس‘ بن گیا تھا، جس کا اردو ترجمہ ہے ’ہمیں انصاف چاہیے‘۔
اس نعرے نے ممتا بنرجی کی ترنمول کانگریس حکومت کو کافی پریشانی میں ڈال دیا تھا۔ بہت سے لوگوں کا دعویٰ ہے کہ دو سال بعد مغربی بنگال میں ان کی حکومت کے خاتمے کے پس منظر میں آر جی کر تحریک اور اس کے دوران مقبول ہونے والے ’انصاف‘ کے نعرے کا بھی کردار رہا ہے۔ بدلے ہوئے سیاسی حالات میں ممتا بنرجی نے دہلی میں ایک بار پھر اسی معروف نعرے کا استعمال کیا ہے۔
اپوزیشن جماعتوں نے گیانیش کمار پر الزام لگایا ہے کہ وہ ووٹر لسٹ میں ہیرا پھیری کرکے انتخابات میں مرکز میں برسراقتدار بی جے پی کو فائدہ پہنچا رہے ہیں۔ اس سلسلے میں انڈین ایکسپریس کی ایک رپورٹ منظر عام پر آنے کے بعد ممتا بنرجی اور راہل گاندھی سمیت دیگر اپوزیشن رہنما متحد ہوکر احتجاج کے لیے سڑکوں پر اترے ہیں۔
دوسری جانب، ’کاکروچ جنتا پارٹی‘ (سی جے پی) بھی دہلی میں احتجاجی تحریک چلا رہی ہے۔ گزشتہ 10 اکتوبر، بروز ہفتہ، ان کے احتجاج کے دن ممتا بنرجی اپنی رہائش گاہ کے سامنے بس اسٹینڈ پر دھرنے پر بیٹھ گئی تھیں۔ پولیس نے انہیں حراست میں لے کر پریزن وین میں بٹھا دیا تھا، تاہم بعد میں انہیں رہا کر دیا گیا۔ پیر کو وہ ایک بار پھر احتجاج کے لیے سڑکوں پر اتر رہی ہیں۔