دستاویزات لینے گئی نرس کو جنسی ہراسانی کا سامنا! مارپیٹ کا بھی الزام، گڑبیتا کے بلاک ہیلتھ افسر گرفتار
ایک نرس کو جنسی طور پر ہراساں کرنے اور اس کے ساتھ مارپیٹ کرنے کا الزام بلاک میڈیکل آفیسر آف ہیلتھ (بی ایم او ایچ) پر عائد ہوا ہے۔ الزام ہے کہ نرس نے ان کی محبت کی پیشکش قبول نہیں کی، جس کے بعد اسے ہراسانی کا سامنا کرنا پڑا۔ نرس کی شکایت پر محکمہ صحت کے افسر پرویر کمار باو¿ڑی کو گڑبیتا تھانے کی پولیس نے گرفتار کر لیا ہے۔
پولیس ذرائع کے مطابق، گزشتہ جمعرات کو گڑبیتا کے ایک صحت مرکز کی ذمہ دار نرس کچھ ضروری دستاویزات لینے کے لیے بی ایم او ایچ کے دفتر گئی تھی۔ الزام ہے کہ دستاویزات دیتے وقت بی ایم او ایچ نے پہلے اسے محبت کی پیشکش کی اور بعد میں جنسی طور پر ہراساں کیا۔ اس پیشکش کو قبول نہ کرنے پر ملزم نے اس کے ساتھ مارپیٹ بھی کی۔ نرس نے گڑبیتا میں اپنا علاج کروایا۔
شکایت کنندہ کے حوالے سے معلوم ہوا ہے کہ ابتدا میں وہ تھانے میں تحریری شکایت درج کرانے سے ہچکچا رہی تھی۔ بعد میں اہل خانہ کے مشورے پر اتوار کو گڑبیتا تھانے میں تحریری شکایت درج کرائی۔ شکایت ملتے ہی پولیس نے تفتیش شروع کر دی۔ الزام ہے کہ متعلقہ ڈاکٹر نے فرار ہونے کی کوشش کی۔ اس کے بعد گڑبیتا تھانے کی پولیس نے کئی ٹیمیں تشکیل دے کر تلاشی مہم شروع کی۔ اتوار کی رات ملزم کو گرفتار کر لیا گیا۔ الزام ہے کہ اس سے پہلے بھی مذکورہ ہیلتھ افسر نے کئی مرتبہ نرس کو نامناسب پیشکشیں کی تھیں۔ پیر کو گرفتار ملزم کو گڑبیتا عدالت میں پیش کیا گیا۔
ضلع کے چیف ہیلتھ آفیسر سومیہ شنکر سرنگی نے بتایا کہ اس پورے معاملے کی محکمانہ تحقیقات کی جائیں گی۔ انہوں نے کہا، ”اس سے پہلے بھی اس ڈاکٹر کے خلاف کئی شکایات موصول ہوئی تھیں۔ اس وقت بھی محکمہ? صحت نے کارروائی کی تھی۔“