اپوزیشن نے خواتین کے ریزرویشن سے متعلق آئینی ترمیمی بل کو منظور نہیں ہونے دیا: امیت شاہ کی کیا شکوہ

نئی دہلی، 17 اپریل: مرکزی وزیر داخلہ امیت شاہ نے کہا ہے کہ ناری شکتی وندن ایکٹ کو نافذ کرنے کے لیے ضروری آئینی ترمیمی بل کو کانگریس، ترنمول کانگریس، ڈی ایم کے اور سماج وادی پارٹی نے لوک سبھا میں منظور نہیں ہونے دیا۔ امیت شاہ نے آئین (131واں) ترمیمی بل 2026 کے ایوان میں منظور نہ ہونے پر اپوزیشن کو تنقید کا نشانہ بناتے ہوئے سوشل میڈیا پلیٹ فارم ایکس پر جمعہ کو کہا کہ آج لوک سبھا میں ایک عجیب منظر دیکھنے کو ملا۔ انہوں نے کہا کہ ناری شکتی وندن ایکٹ کے لیے ضروری آئینی ترمیمی بل کو کانگریس، ترنمول کانگریس، دراوڑ منیتر کڑگم (ڈی ایم کے ) اور سماج وادی پارٹی نے پاس نہیں ہونے دیا۔ خواتین کو 33 فیصد ریزرویشن دینے سے متعلق بل کو گرا دینا، اس کا جشن منانا اور نعرے لگانا واقعی قابل مذمت اور ناقابل تصور ہے ۔ انہوں نے کہا کہ اب ملک کی خواتین کو لوک سبھا اور ریاستی اسمبلیوں میں 33 فیصد ریزرویشن نہیں مل سکے گا، جو ان کا حق تھا۔ انہوں نے الزام لگایا کہ کانگریس اور اس کے اتحادیوں نے ایسا پہلی بار نہیں کیا بلکہ بار بار ایسا کرتے رہے ہیں، اور ان کی یہ سوچ نہ خواتین کے مفاد میں ہے اور نہ ہی ملک کے مفاد میں۔ مرکزی وزیر داخلہ نے کہاکہ "میں انہیں بتانا چاہتا ہوں کہ ناری شکتی کی توہین کی یہ بات یہیں نہیں رکے گی بلکہ دور تک جائے گی۔ اپوزیشن کو خواتین کے غصے کا سامنا نہ صرف 2029 کے لوک سبھا انتخابات میں بلکہ ہر سطح، ہر انتخاب اور ہر جگہ کرنا پڑے گا۔"

Source: UNI NEWS