اپوزیشن پارٹیاں راجیہ سبھا میں ڈپٹی چیئرمین کے انتخاب کا کریں گی بائیکاٹ

کانگریس کی قیادت میں اپوزیشن پارٹیاں راجیہ سبھا کے ڈپٹی چیئرمین انتخاب کا بائیکاٹ کرنے والی ہیں۔ اس سلسلے میں آج کانگریس جنرل سکریٹری جئے رام رمیش نے جانکاری دی۔ انھوں نے جمعرات کے روز کہا کہ اپوزیشن راجیہ سبھا کے ڈپٹی چیئرمین عہدہ کے انتخاب کا بائیکاٹ کرے گا۔ ساتھ ہی انھوں نے کہا کہ اپوزیشن کی طرف سے یہ فیصلہ لوک سبھا میں گزشتہ 7 سالوں سے ڈپٹی اسپیکر کی تقرری نہیں کیے جانے کی مخالفت میں لیا گیا ہے۔ جئے رام رمیش نے سوشل میڈیا پلیٹ فارم ’ایکس‘ پر جاری اپنی ایک پوسٹ میں کہا کہ اس مسئلہ پر حکومت کی طرف سے کوئی بامعنی صلاح و مشورہ بھی نہیں لیا گیا۔ انھوں نے امید ظاہر کی کہ ہری ونش 3.0 اپوزیشن کے مشوروں کے تئیں زیادہ حساس ہوگا۔ قابل ذکر ہے کہ صدر جمہوریہ نے گزشتہ دنوں ہری ونش کو تیسری بار ایوانِ بالا کے لیے نامزد کیا ہے۔ ’ہری ونش 3.0‘ کا مطلب ایوان بالا کے سابق ڈپٹی چیئرمین ہری ونش کی تیسری مدت کار ہے۔ وہ گزشتہ 2 بار ڈپٹی چیئرمین رہ چکے ہیں اور حال میں ان کی مدت کار ایوانِ بالا میں ختم ہوئی ہے۔

Source: social media