امریکی صدر ڈونلڈ ٹرمپ کی جانب سے ہارورڈ یونیورسٹی میں بین الاقوامی طلبہ کے داخلوں پر پابندی عائد کرنے کے فیصلے پر رد عمل کا اظہار کرتے ہوئے ... چین نے تعلیم کو سیاسی رنگ دینے کی مخالفت کی ہے۔ جمعرات کو ایک معمول کی پریس بریفنگ کے دوران چینی وزارتِ خارجہ کے ترجمان لین جیان نے کہا کہ ان کا ملک تعلیم کو سیاست سے آلودہ کرنے کی مخالفت کرتا ہے۔ انھوں نے مزید کہا کہ اس قسم کے اقدامات سے صرف امریکہ کی ساکھ اور اعتبار کو ہی نقصان پہنچے گا۔ ترجمان کا کہنا تھا کہ چین اور امریکہ کے درمیان تعلیمی تعاون دونوں فریقوں کے لیے فائدہ مند ہے، اور چین اپنے بیرون ملک طلبہ اور محققین کے جائز مفادات کا بھرپور دفاع کرے گا۔ صدر ٹرمپ نے بدھ کے روز ایک ابتدائی فیصلے کے تحت ہارورڈ یونیورسٹی میں تعلیم حاصل کرنے یا تبادلہ پروگراموں میں شریک ہونے کے خواہش مند غیر ملکی طلبہ کا امریکہ میں داخلہ چھ ماہ کے لیے معطل کر دیا۔ یہ فیصلہ اس وقت آیا جب حکومت اور امریکہ کی ایک مؤقر یونیورسٹی کے درمیان کشیدگی میں اضافہ ہو رہا ہے۔ ٹرمپ نے اس فیصلے کی وجہ قومی سلامتی کے خدشات کو قرار دیا، جنھیں انھوں نے غیر ملکی طلبہ کے داخلے پر پابندی کا جواز بتایا۔ ہارورڈ یونیورسٹی نے ایک بیان میں ٹرمپ کے اقدام کو "امریکی حکومت کی جانب سے ایک اور غیر قانونی انتقامی قدم" قرار دیا، جو امریکی آئین کی پہلی ترمیم کے تحت یونیورسٹی کے حقوق کی خلاف ورزی ہے۔ یونیورسٹی نے یہ بھی کہا کہ وہ اپنے غیر ملکی طلبہ کا دفاع جاری رکھے گی۔ یہ پابندی چھ ماہ سے زیادہ عرصے تک بھی جاری رہ سکتی ہے۔ ٹرمپ کے فیصلے کے تحت امریکی محکمہ خارجہ کو ہدایت دی گئی ہے کہ وہ ان تمام طلبہ کے تعلیمی یا تبادلہ پروگرام ویزے منسوخ کرنے پر غور کرے جو ہارورڈ یونیورسٹی میں زیر تعلیم ہیں اور اس فیصلے کے معیار پر پورا اترتے ہیں۔

Source: social media