چنڈی گڑھ، 8 اکتوبر: ہریانہ اسمبلی انتخابات کے چونکا دینے والے نتائج میں کئی بڑے نام جیت گئے تو کچھ ہار بھی گئے ہیں۔ جیتنے والوں میں وزیراعلیٰ نایب سنگھ سینی ہیں، جنہوں نے پانچ ماہ میں دوسرا الیکشن لڑا ہے۔ وزیر اعلیٰ بننے کے بعد انہوں نے کرنال سے ضمنی انتخاب جیتا تھا اور اب لاڈوا سے الیکشن جیتا ہے۔ قائد حزب اختلاف بھوپیندر سنگھ ہڈا نے روایتی گڑھی سامپلا کلوئی سیٹ سے اپنے قریبی حریف منجو کو 70 ہزار کے بڑے فرق سے شکست دی۔ کانگریس کی غالباً سب سے زیادہ مقبول امیدوار، پہلوان ونیش پھوگٹ، جُلانہ سے سخت مقابلے میں بھارتیہ جنتا پارٹی (بی جے پی) کے کپتان یوگیش بیراگی سے 6015 ووٹوں کے فرق سے جیت گئیں۔ سابق وزیر داخلہ اور بی جے پی حکومت میں وزیر اعلیٰ بننے کے خواہشمند (ان کے الفاظ میں، اگر پارٹی چاہے تو)، انل وج امبالا چھاؤنی سے سخت مقابلے میں باغی کانگریس امیدوار چترا سرورا سے 7000 ووٹوں کے فرق سے الیکشن جیتا۔ توشام سے بی جے پی امیدوار شروتی چودھری نے کانگریس امیدوار اور اپنے بھائی انیرودھ چودھری سے سخت مقابلے میں 14000 ووٹوں کے فرق سے الیکشن جیت گئیں۔ سابق اسمبلی اسپیکر گیان چند گپتا پنچکولہ سے کانگریس امیدوار چندر موہن سے الیکشن ہار گئے۔ وزیر کمل گپتا حصار سیٹ سے بری طرح ہار گئے اور تیسرے نمبر پر رہے۔ یہاں سے بی جے پی کی باغی امیدوار ساوتری جندل نے الیکشن جیتا اور کانگریس کے امیدوار رام نواس رارا دوسرے نمبر پر رہے۔ وزیر اسیم گوئل امبالہ سٹی سیٹ سے کانگریس کے نرمل سنگھ موہرا سے الیکشن ہار گئے۔ وزیر سبھاش سودھا تھانیسر سے کانگریس امیدوار اشوک کمار اروڑا سے سخت مقابلے میں 3000 ووٹوں کے فرق سے ہار گئے۔ سابق نائب وزیر اعلیٰ دشینت چوٹالہ اوچنا کلاں سے انتخاب بری طرح ہار گئے۔ وہ صرف 7920 ووٹ لے کر پانچویں نمبر پر رہے۔ کانگریس صدر ادے بھان ہوڈل سے ڈھائی ہزار ووٹوں کے فرق سے الیکشن ہار گئے۔ ہریانہ لوک ہت پارٹی (ایچ ایل پی اے) کے گوپال کانڈا سرسا سے الیکشن ہار گئے۔ انہیں کانگریس کے گوکل سیٹیا نے ہرایا۔ انڈین نیشنل لوک دل کے پرنسپل جنرل سکریٹری ابھے سنگھ چوٹالہ ایلن آباد سے کانگریس کے بھرت سنگھ بینیوال سے 15000 ووٹوں سے ہار گئے۔

Source: uni news