سیما حیدر ایک بار پھر ماں بن گئیں

پاکستان سے اپنے چار بچوں سمیت نیپال کے راستے بھارت فرار ہونے والی سیما حیدر اور ان کے بھارتی شوہر سچن ایک بار پھر والدین بن گئے۔ میڈیا کے مطابق سیما حیدر نے گریٹر نوئیڈا کے ایک نجی اسپتال میں بیٹے کو جنم دیا ہے۔ سچن کے ساتھ یہ ان کا دوسرا بچہ ہے، 11 ماہ پہلے جوڑے کے ہاں بیٹی کی پیدائش ہوئی تھی۔ اسپتال انتظامیہ کے مطابق سیما حیدر اور نومولود بیٹا دونوں صحت مند ہیں۔ اسپتال سے چھٹی ملنے کے بعد سیما حیدر نوزائیدہ بیٹے کے ساتھ گوتم بدھ نگر کے علاقے ربو پورہ میں واقع اپنے گھر پہنچیں، اس موقع پر سچن اور ان کے اہل خانہ نے مٹھائیاں تقسیم کیں اور گھر میں جشن کا سماں رہا۔ پاکستان کے شہر جیکب آباد کی رہائشی سیما حیدر مئی 2023 میں اپنے چار بچوں کے ساتھ نیپال کے راستے غیر قانونی طور پر بھارت میں داخل ہوئی تھیں۔ سچن اور ان کی ملاقات 2019 میں ایک آن لائن گیم کے ذریعے ہوئی تھیم دونوں نے آن لائن بات چیت شروع کی جو رفتہ رفتہ محبت میں بدل گئی۔ سیما حیدر نے بھارت پہنچنے کے بعد گریٹر نوئیڈا کے علاقے ربو پورہ میں سچن کے ساتھ رہنا شروع کیا اور تب سے وہ سرخیوں میں ہیں اور ان کی کہانی ملک بھر میں بحث کا موضوع بنی ہوئی ہے۔ واضح رہے کہ سیما حیدر کے پہلے شوہر غلام حیدر کا تعلق پاکستان سے ہے جو دبئی میں مقیم ہے۔ سیما حیدر اور سچن کو جولائی 2023 میں گرفتار کیا گیا تھا لیکن بعد میں انہیں ضمانت پر رہا کر دیا گیا۔ ضمانت کے بعد میڈیا سے گفتگو میں وہ مسلسل یہ کہتی رہی ہیں کہ وہ سچن کے ساتھ رہنے کیلیے بس کے ذریعے نیپال بارڈر سے نوئیڈا پہنچیں۔ خاتون کے پہلے شوہر غلام حیدر نے بھارتی حکومت سے اپیل کر رکھی ہے کہ انہیں اپنے بچوں سے ملنے دیا جائے اور ان کی کیسٹڈی دی جائے۔

Source: SOCIAL MEDIA