ڈیڑھ دہائی پر مشتمل لیو اِن ریلیشن شپ، پھر بریک اپ: کیا یہ عصمت دری کا معاملہ ہے ؟ سپریم کورٹ کے سوالات، ثالثی کی تجویز

نئی دہلی، 27 اپریل : سپریم کورٹ نے پیر کے روز ایک اہم سوال اٹھاتے ہوئے کہا کہ کیا 15 سال طویل لیو اِن ریلیشن شپ کے خاتمے کو عصمت دری کا معاملہ قرار دیا جا سکتا ہے ، خاص طور پر جب جوڑے کا ایک بچہ بھی ہو اور مرد رشتہ ختم کرکے الگ ہو گیا ہو۔ جسٹس بی وی ناگرتنا اور جسٹس اُجول بھوئیاں کی بنچ ایک خاتون کی درخواست پر سماعت کر رہی تھی، جس نے 15 سال کے لیو اِن ریلیشن شپ کے بعد شادی کے وعدے سے مکرنے پر ایک شخص پر جنسی استحصال کا الزام لگایا تھا۔ عدالت نے اس بات پر شبہ ظاہر کیا کہ کیا ایسی صورتحال میں کوئی فوجداری مقدمہ بنتا ہے ۔ بنچ نے تبصرہ کیا کہ کئی سالوں تک باہمی رضامندی سے قائم رہنے والے تعلقات کو بریک اپ کے بعد فوجداری مقدمے میں تبدیل نہیں کیا جا سکتا۔ عدالت نے واضح طور پر سوال کیا کہ کیا کسی مرد کا ایسے رشتے سے نکل جانا بذاتِ خود ایک جرم سمجھا جا سکتا ہے ؟ درخواست گزار خاتون نے بتایا کہ جب وہ ملزم سے ملی تھی تو وہ 18 سالہ بیوہ تھی۔ ملزم نے اس سے شادی کا وعدہ کیا تھا، جس پر اعتماد کرتے ہوئے اس نے ڈیڑھ دہائی تک اس کے ساتھ زندگی گزاری اور ان کا ایک بچہ بھی ہوا۔ خاتون کا الزام ہے کہ بعد میں اسے معلوم ہوا کہ وہ شخص پہلے سے شادی شدہ تھا اور اس کے دیگر خواتین کے ساتھ بھی تعلقات تھے ۔ عدالت نے رشتے کی طویل مدت، اس کی نوعیت اور شکایت درج کرانے میں تاخیر (15 سال بعد) پر سنگین قانونی خدشات ظاہر کیے ۔ بنچ نے کہا کہ اگرچہ درخواست گزار کی صورتحال ہمدردی پیدا کر سکتی ہے ، لیکن جرم کے عناصر کو واضح طور پر ثابت کیے بغیر فوجداری قانون کا سہارا نہیں لیا جا سکتا۔ عدالت نے اس معاملے کو دیگر خواتین سے متعلق الزامات تک وسعت دینے سے بھی انکار کر دیا۔ عدالت نے مشورہ دیا کہ خاتون بچے کے نان و نفقہ سمیت دیگر قانونی راستے اختیار کر سکتی ہے ، لیکن فوجداری مقدمہ چلانے کے لیے واضح قانونی بنیاد ضروری ہے ۔ اس کے بعد سپریم کورٹ نے اس تنازع کو ثالثی کے لیے بھیج دیا۔

Source: UNI NEWS