سرکاری رہائش خالی کرنے سے انکار، سابق وزیر اعلیٰ رابڑی دیوی بولیں-فورس بلا کر خالی کرا لیں

پٹنہ: بہار میں وزیر اعلیٰ سمراٹ چودھری کی قیادت میں نئی حکومت کے قیام کے بعد سرکاری رہائش گاہوں کی ازسرنو تقسیم کا عمل شروع ہو گیا ہے، جس پر سیاسی تنازع بھی کھڑا ہو گیا ہے۔ سابق وزیر اعلیٰ رابڑی دیوی نے اپنے سرکاری بنگلے کو خالی کرنے سے صاف انکار کرتے ہوئے حکومت کو کھلا چیلنج دے دیا ہے۔ رابڑی دیوی نے میڈیا سے گفتگو کرتے ہوئے واضح کیا کہ وہ 10 سرکولر روڈ واقع سرکاری رہائش گاہ خالی نہیں کریں گی۔ انہوں نے کہا کہ اگر حکومت چاہتی ہے تو پولیس فورس کا استعمال کرکے بنگلہ خالی کرا سکتی ہے، لیکن وہ اپنی مرضی سے وہاں سے نہیں جائیں گی۔ انہوں نے وزیر اعلیٰ سمراٹ چودھری کو نشانہ بناتے ہوئے کہا، ’’وہ ابھی ابھی وزیر اعلیٰ بنے ہیں۔ اگر انہیں بنگلہ خالی کرانا ہے تو فورس بلا کر خالی کروا لیں، ہم یہ مکان خالی نہیں کریں گے۔‘‘ واضح رہے کہ 10 سرکولر روڈ واقع سرکاری بنگلہ طویل عرصے سے رابڑی دیوی کے زیر استعمال رہا ہے۔ نئی حکومت نے یہ رہائش گاہ ریاستی وزیر نند کشور رام کے نام الاٹ کر دی ہے۔ محکمہ تعمیراتِ عامہ (بلڈنگ کنسٹرکشن ڈپارٹمنٹ) کی جانب سے جمعہ کو جاری کیے گئے حکم نامے کے مطابق بنگلے کا باضابطہ الاٹمنٹ نند کشور رام کے نام کر دیا گیا ہے۔ اس کے ساتھ ہی بنگلے پر نئے وی وی آئی پی نیم پلیٹ نصب کرنے کی تیاریاں بھی شروع کر دی گئی ہیں، جو اس کے رسمی ٹرانسفر کی جانب اشارہ کرتی ہیں۔ اس سے قبل محکمہ تعمیرات نے بہار قانون ساز کونسل میں قائد حزب اختلاف رابڑی دیوی کو سرکاری نوٹس جاری کرکے 10 سرکولر روڈ کی رہائش گاہ خالی کرنے کی ہدایت دی تھی۔ یہ بنگلہ بہار کی سیاست میں ایک خاص مقام رکھتا ہے۔ برسوں تک یہ سابق وزیر اعلیٰ اور آر جے ڈی سربراہ لالو پرساد یادو اور رابڑی دیوی کی سیاسی سرگرمیوں کا مرکز رہا ہے۔ راشٹریہ جنتا دل (آر جے ڈی) کی کئی اہم سیاسی میٹنگیں، حکمت عملی سے متعلق مشاورت اور تنظیمی سرگرمیاں اسی مقام پر انجام پاتی رہی ہیں۔ ریاستی حکومت نے رابڑی دیوی کو اس کے بدلے پٹنہ کے ہارڈنگ روڈ علاقے میں ایک نئی سرکاری رہائش گاہ الاٹ کی ہے۔ سرکاری حکام کے مطابق یہ بنگلہ سابق وزرائے اعلیٰ کو دی جانے والی سہولیات، سکیورٹی انتظامات اور سرکاری پروٹوکول کے مطابق مکمل طور پر تیار ہے۔ محکمہ تعمیرات کے ذرائع کا کہنا ہے کہ یہ فیصلہ مکمل طور پر انتظامی عمل کا حصہ ہے اور سرکاری رہائش گاہوں کی تقسیم سے متعلق مقررہ ضوابط کے تحت کیا گیا ہے۔ محکمے کے مطابق وزراء کو ان کے عہدے کے مطابق مختلف زمروں میں سرکاری رہائش گاہیں فراہم کی جاتی ہیں اور اسی ضابطے کے تحت 10 سرکولر روڈ کا بنگلہ وزیر نند کشور رام کو الاٹ کیا گیا ہے۔ اس معاملے پر اب سیاسی کشیدگی بڑھنے کے آثار ہیں، کیونکہ رابڑی دیوی کے سخت موقف کے بعد حکومت اور اپوزیشن کے درمیان یہ تنازع مزید شدت اختیار کر سکتا ہے۔

Source: social media