سر پر بوجھ اور کمر پر بچہ، محنت کش ماں کی ویڈیو نے سوشل میڈیا پر سب کو رلا دیا

نئی دہلی: سوشل میڈیا پر ان دنوں ایک ایسی ویڈیو تیزی سے وائرل ہو رہی ہے جسے دیکھ کر ہر شخص حیران ہیں، وہی ان کی آنکھیں بھی نم ہو گئی ہیں۔ یہ ویڈیو ایک ماں کی بے لوث محبت اور اس کی ہمت کی وہ داستان بیان کر رہی ہے جو الفاظ میں بیان کرنا مشکل ہے۔ وائرل ہونے والی اس مختصر کلپ میں دیکھا جا سکتا ہے کہ ایک خاتون اپنی روزمرہ زندگی کی سخت جدوجہد میں مصروف ہے۔ اس نے اپنی کمر پر ایک چھوٹے بچے کو کپڑے سے باندھ رکھا ہے اور ساتھ ہی سر پر ایک بھاری بوری اٹھائے ہوئے تیزی سے سیڑھیاں چڑھ رہی ہے۔ خاتون کے چہرے پر تھکن کے آثار تو ہیں، مگر اس کے قدموں میں کوئی لرزش نہیں۔ یہ منظر محض ایک ویڈیو نہیں بلکہ ان لاکھوں ماؤں کی زندگی کی عکاسی کرتا ہے جو نامساعد حالات میں بھی اپنے بچوں کے مستقبل اور خاندان کی ذمہ داریوں کے لیے دن رات ایک کر دیتی ہیں۔ جیسے ہی یہ ویڈیو انٹرنیٹ پر اپ لوڈ ہوئی، صارفین نے اس پر دل کھول کر تبصرے کیے۔ سوشل میڈیا پر لوگ اس خاتون کو "سوپر وومن” اور "اصلی ہیرو” قرار دے رہے ہیں۔ ایک صارف نے لکھا: "ماں واقعی کائنات کی سب سے بڑی طاقت ہے، جو خود بوجھ اٹھاتی ہے تاکہ اس کا بچہ سکون سے رہ سکے۔” دوسرے صارف کا کہنا تھا: "اس ویڈیو نے یہ ثابت کر دیا کہ ایک ماں اپنے بچوں کی خاطر پہاڑ جیسا بوجھ بھی ہنس کر اٹھا سکتی ہے۔” کئی لوگوں نے خاتون کی ہمت کو سلام پیش کیا اور انتظامیہ سے اس کی مالی مدد کرنے کی اپیل بھی کی۔ یہ ویڈیو ہمیں اس تلخ حقیقت کی یاد دہانی بھی کرواتی ہے کہ معاشرے کا ایک طبقہ آج بھی بنیادی ضرورتوں کے لیے کتنی سخت مشقت کرنے پر مجبور ہے۔ جہاں دنیا ٹیکنالوجی اور آسائشوں کی بات کرتی ہے، وہیں یہ ‘جفاکش ماں’ ہمیں بتاتی ہے کہ محنت اور ہمت ہی زندگی کا دوسرا نام ہے۔ یہ وائرل ویڈیو سوشل میڈیا پر محض ایک ٹرینڈ نہیں بلکہ ممتا کے اس جذبے کو سلام ہے جو ہر مشکل کو شکست دینے کی طاقت رکھتا ہے

Source: social media