شیئر بازار گراوٹ کے ساتھ کھلے، آئی ٹی سیکٹر میں فروخت حاوی

ممبئی: بیرون ممالک سے ملنے والے منفی اشاروں کے درمیان گھریلو شیئر بازاروں میں جمعرات کو ابتدائی کاروبار کے دوران گراوٹ دیکھی گئی۔ بی ایس ای کا سینسیکس 367.19 پوائنٹس گر کر 73,615.99 پر کھلا۔ تھوڑی ہی دیر میں یہ 464 پوائنٹس گر گیا تھا۔ خبر لکھے جانے تک یہ 351.43 پوائنٹس (0.48 فیصد) گر کر 73,631.75 پر تھا۔ امریکہ اور ایران کے درمیان کشیدگی بڑھنے سے ایشیا کی دیگر بڑی اسٹاک مارکیٹیں بھی سرخ نشان میں ہیں۔ نیشنل اسٹاک ایکسچنج کا نفٹی – 50 انڈیکس بھی 110.55 پوائنٹس کی کمی کے ساتھ 23,104.40 پوائنٹس پر کھلا۔ تادم تحریر یہ 97.70 پوائنٹس یعنی 0.42 فیصد گر کر 23,117.25 پوائنٹس پر تھا۔ میڈیا، فارما اور صحت کی دیکھ بھال کے شعبوں کے علاوہ تمام سیکٹرز میں گراوٹ ہے۔ آئی ٹی پر سب سے زیادہ دباؤ ہے۔ کنزیومر ڈیوریبلز، آٹو، پبلک سیکٹر کے بینک اور کیمیکل سیکٹرز میں بھی فروخت دیکھی جارہی ہے۔ دنیا بھر میں آئی ٹی کمپنیوں کی فروخت ہندوستانی کمپنیوں پر بھی اثر انداز ہو رہی ہے۔ سینسیکس میں ایچ سی ایل ٹیکنالوجیز کا شیئرتین فیصد سے زیادہ ٹوٹ گیا ہے۔ انفوسس تین فیصد اور ٹیک مہندرا تقریباً ڈھائی فیصد نیچے ہے۔ ٹی سی ایس، ایٹرنل اور ٹرینٹ ڈیڑھ فیصد سے زیادہ نیچے ہیں۔

Source: social media