شنکرآچاریہ کا بغیر اشنان کے لوٹنا بدشگون:اکھلیش

لکھن¶ 28 جنوری:سماجوادی پارٹی (ایس پی) کے قومی صدر اکھلیش یادو نے بدھ کو پریاگ راج ماگھ میلہ کے حوالے سے ریاست کی بی جے پی حکومت کو ہدف تنقید بناتے ہوئے کہا کہ شنکراچاریہ کا مقدس دھرتی پریاگ راج سے بغیر اشنان کیے واپس لوٹنا نہایت منحوس واقعہ ہے ، جس سے نہ صرف دل آزاری ہوئی ہے بلکہ پوری سناتن دھرم برادری تشویش میں مبتلا ہے ۔ سابق وزیر اعلی نے بدھ کو اپنے سوشل میڈیا ہینڈل پرالزام عائد کیا کہ اگر بی جے پی اور اس کے اتحادی چاہتے تو اپنی 'اقتدار کے گھمنڈ'کو ایک طرف رکھ کر خود پالکی اٹھا کر تروینی سنگم تک لے جاتے اور سنت کو مقدس اشنان کروا کر ان کے وقار کا تحفظ کرتے ، لیکن اقتدار کی انا نے انہیں ایسا کرنے سے روک دیا۔ انہوں نے کہا کہ سنتوں کے جذبات کو ٹھیس پہنچا کر کوئی خوشی حاصل نہیں کر سکتا۔ ان کے مطابق غلطی کرنے سے بڑی غلطی یہ ہے کہ اس پر معافی نہ مانگی جائے ۔ کوئی بھی سیاسی عہدہ سنتوں کے احترام سے بڑا نہیں ہو سکتا۔ اکھلیش نے الزام لگایا کہ بی جے پی سناتن دھرم کے تئیں مخلص نہیں ہے اور آج سناتن دھرم کا ہر پیروکاررنجور ہے ۔ ایس پی صدر نے مزید کہا کہ مذہبی رسومات میں رکاوٹیں پیدا کرنا مذہبی گرنتھوں کی بنیادی تعلیمات کے خلاف ہے ۔ انہوں نے خبردار کیا کہ تکبر کی سزا طے ہے اور کہا کہ 'مجروح سنت کا مطلب اقتدار کا خاتمہ ہے '۔

Source: UNI NEWS