’مودی حکومت نے پارلیمنٹ کا مذاق بنا دیا‘، رکن پارلیمنٹ ڈیریک او برائن نے مرکز پر عائد کیا سنگین الزام

ترنمول کانگریس (ٹی ایم سی) کے راجیہ سبھا رکن ڈیریک او برائن نے مودی حکومت پر سخت حملہ کرتے ہوئے پارلیمنٹ کے طریقۂ کار پر سنگین سوالات اٹھائے ہیں۔ انہوں نے الزام لگایا کہ حکومت پارلیمانی نظام کا مذاق بنا رہی ہے اور اہم عہدوں کو لے کر دوہرا معیار اپنا رہی ہے۔ ڈیریک او برائن نے کہا کہ لوک سبھا کے نائب اسپیکر کا عہدہ 2019 سے خالی پڑا ہے، لیکن حکومت نے اتنے طویل عرصے میں اسے بھرنے کی کوئی سنجیدہ کوشش نہیں کی۔ انہوں نے سوال اٹھایا کہ جب یہ اہم آئینی عہدہ برسوں سے خالی ہے تو اس پر توجہ کیوں نہیں دی جا رہی، جبکہ راجیہ سبھا کے نائب چیئرمین کا عہدہ، جو محض 10 دن قبل خالی ہوا ہے، اسے بھرنے کے لیے بی جے پی غیر معمولی عجلت کا مظاہرہ کر رہی ہے۔ ٹی ایم سی رکن پارلیمنٹ نے مزید کہا کہ اس معاملے میں حکومت کا رویہ شکوک و شبہات کو جنم دیتا ہے اور یہ ظاہر کرتا ہے کہ پارلیمانی روایات کو نظرانداز کیا جا رہا ہے۔ ان کے مطابق، حکومت کو چاہیے کہ وہ دونوں ایوانوں میں اہم عہدوں کو یکساں سنجیدگی کے ساتھ پُر کرے، نہ کہ سیاسی مفادات کے تحت فیصلے کرے۔ ڈیریک او برائن نے نائب چیئرمین کے انتخاب کی تاریخ پر بھی سوال کھڑے کیے۔ انہوں نے کہا کہ بی جے پی 17 اپریل کو ہی یہ انتخاب کیوں کروانا چاہتی ہے؟ ان کے مطابق اس وقت ملک کے مختلف حصوں میں اسمبلی انتخابات جاری ہیں اور کئی اراکین پارلیمنٹ اپنے اپنے حلقوں میں انتخابی مہم میں مصروف ہیں۔ ایسے وقت میں ایوان کے اندر اس نوعیت کا انتخاب کروانا نہ صرف غیر مناسب ہے بلکہ جمہوری اصولوں کے بھی خلاف ہے۔ ڈیرک او برائن نے اس پورے عمل کو ’شرمناک‘ قرار دیتے ہوئے کہا کہ حکومت کو پارلیمانی وقار اور جمہوری اقدار کا احترام کرنا چاہیے۔ انہوں نے مطالبہ کیا کہ ایسے فیصلوں میں شفافیت اور تمام اراکین پارلیمنٹ کی سہولت کو مدنظر رکھا جائے، تاکہ پارلیمنٹ کی ساکھ برقرار رہ سکے۔

Source: social media