اسرائیلی وزیرِاعظم بنجمن نیتن یاھو ایک لیک ہونے والی آڈیو کے بعد شدید سیاسی دباؤ کا شکار ہو گئے ہیں، جس میں وہ ایک بااثر حریدی (یہودی مذہبی طبقہ) رہنما سے یہ وعدہ کرتے سنائی دیتے ہیں کہ وہ حریدی یہودیوں کو لازمی فوجی سروس سے چھوٹ دلوانے کے لیے قانون سازی کریں گے۔ اس آڈیو میں نیتن یاھو یہ اعتراف کرتے ہیں کہ انہوں نے سابق وزیر دفاع یوآف گلینٹ اور آرمی چیف ہرزی ہليوی کو اس لیے عہدوں سے ہٹایا کیونکہ وہ اس قانون کے مخالف تھے۔ یہ آڈیو اسرائیل کے نجی ٹی وی چینل "چینل 13" نے نشر کی، جس کے مطابق مارچ میں نیتن یاھو اور ليتوانی حریدی دھڑے کے رہنما حاخام موشیہ ہلیل ہیرش کے درمیان ایک ملاقات ہوئی تھی۔ اس وقت بجٹ ووٹنگ قریب تھی اور حریدی جماعتیں قانون سازی نہ ہونے کی صورت میں بجٹ کے خلاف ووٹ دینے کی دھمکی دے چکی تھیں۔ نیتن یاھو آڈیو میں کہتے ہیں "ہمیں قانون کو اس انداز میں منظور کرانا ہوگا کہ اسے عدالت میں چیلنج نہ کیا جا سکے اور ہم یہ کرنے کی صلاحیت رکھتے ہیں، میں یہ کر کے دکھاؤں گا"۔ انہوں نے مزید اعتراف کیا کہ"ہم نے بڑی رکاوٹیں دور کی ہیں۔ اگر وزیرِ دفاع اور آرمی چیف آپ کے خلاف ہوں تو آپ کیسے آگے بڑھ سکتے ہیں؟ لیکن اب ہم آگے بڑھ سکتے ہیں"۔ یہ انکشافات ایسے وقت میں سامنے آئے ہیں جب اسرائیل میں فوجی سروس سے متعلق قانون پر اختلاف شدت اختیار کر گیا ہے۔ حکومتی اتحاد میں شامل مذہبی جماعتیں قانون منظور نہ ہونے پر کنیسٹ (پارلیمان) کو تحلیل کرنے اور حکومت گرانے کا مطالبہ کر رہی ہیں۔ بدھ کے روز اسرائیلی اخبارات "یدیعوت احرونوت " اور "ہارٹز" نے رپورٹ کیا کہ کئی حریدی حاخامات نے نیتن یاھو کی حکومت سے علیحدگی کی ہدایت جاری کی ہے، کیونکہ وہ قانون سازی میں تاخیر پر ناراض ہیں۔ ایک حاخام نے تو ایک مذہبی جماعت کو الکنیست تحلیل کرنے کے حق میں ووٹ دینے کی ہدایت دی۔ اسرائیلی سرکاری نشریاتی ادارے نے موجودہ صورتحال کو نیتن یاھو حکومت کے لیے ایک بڑا سیاسی امتحان قرار دیا ہے، اور کہا ہے کہ حاخامات کے فیصلے آئندہ سیاسی منظرنامہ متعین کر سکتے ہیں۔

Source: social media