روس سے خام تیل مت خریدو، وینزویلا سے لو... ہندستان کو امریکہ کا آفر

نئی دہلی: امریکہ نے ہندستان کو اشارہ دیا ہے کہ وہ روس کی بجائے وینزویلا سے خام تیل خرید سکتا ہے، لیکن یہ چھوٹ مکمل طور پر واشنگٹن کے کنٹرول میں ہوگی۔ وائٹ ہاؤس کے ایک سینئر اہلکار نے واضح کیا ہے کہ ہندستان کو وینزویلا سے تیل خریدنے کی اجازت دی جا سکتی ہے، تاہم اس کی شرائط اور آپریشنل فریم ورک ابھی طے کیا جا رہا ہے۔ یہ پیشکش ایسے وقت میں سامنے آئی ہے جب روس سے تیل کی درآمدات کے معاملے پر ہندستان پر دباؤ بڑھتا جا رہا ہے۔ امریکی انتظامیہ کا کہنا ہے کہ وینزویلا کا تیل دوبارہ عالمی منڈی میں آ سکتا ہے، لیکن اسے براہِ راست وینزویلا فروخت نہیں کرے گا۔ امریکی وزیرِ توانائی کرسٹوفر رائٹ کے مطابق، وینزویلا کا تیل امریکہ کی نگرانی میں فروخت کیا جائے گا اور اس سے حاصل ہونے والی آمدنی کنٹرول شدہ کھاتوں میں جمع ہوگی۔ یعنی تیل کی سپلائی چاہے کھل جائے، مگر اس کی قیمت، خریدار اور پیسہ، سب پر امریکہ کی گرفت رہے گی۔ امریکہ پہلے مرحلے میں 30 سے 50 ملین بیرل تیل مارکیٹ میں لانے کی تیاری کر رہا ہے۔ امریکی پابندیوں سے قبل ہندستان وینزویلا کے سب سے بڑے خریداروں میں شامل تھا۔ وینزویلا کا بھاری خام تیل ہندستان کی پیچیدہ ریفائنریوں کے لیے انتہائی موزوں سمجھا جاتا ہے۔ اگر دوبارہ سپلائی شروع ہوتی ہے تو ہندوستان کو توانائی کے ذرائع میں تنوع لانے میں مدد مل سکتی ہے۔ بڑھتی ہوئی گھریلو طلب اور ریفائنری صلاحیت میں توسیع کے درمیان یہ ہندستان کے لیے ایک راحت کی خبر ہو سکتی ہے۔ امریکی صدر ڈونلڈ ٹرمپ نے وینزویلا کے حوالے سے بڑی تبدیلیوں کا خاکہ پیش کیا ہے۔ انہوں نے کہا کہ امریکہ 50 ملین بیرل تک وینزویلا کے تیل کو ریفائن کر کے فروخت کرے گا۔ اس کے ساتھ ہی وینزویلا کے تیل کے شعبے کو دوبارہ کھڑا کرنے کے لیے تقریباً 100 ارب ڈالر کی سرمایہ کاری کا منصوبہ بھی ہے۔ تاہم ٹرمپ نے واضح کیا کہ کن کمپنیوں کو سرمایہ کاری کی اجازت دی جائے گی، اس کا فیصلہ بھی واشنگٹن ہی کرے گا۔

Source: social media