جمعرات کے روز کولکاتا کے کیمک اسٹریٹ میں واقع ڈائمنڈ ہاربر کے ترنمول کانگریس کے ایم پی ابھشیک بنرجی کے دفتر سے کولکاتا میونسپل کارپوریشن اور پولیس انتظامیہ کے ذریعے 'غیر قانونی' بل بورڈ ہٹائے جانے کے بعد زبردست سیاسی ڈرامہ اور ہنگامہ آرائی ہوئی۔ تاہم، کے ایم سی حکام اور پولیس کے وہاں سے روانہ ہوتے ہی ابھشیک کے حامیوں نے اسی جگہ 'آل انڈیا ترنمول کانگریس' کا نیا بینر اور نشان دوبارہ آویزاں کر دیا ہے۔


کیمک اسٹریٹ میں ساتویں منزل پر واقع دفتر پر لگے سائن بورڈ کو ہٹانے کے لیے کے ایم سی عملہ اور ہیلمٹ پہنے ہوئے پولیس اہلکار وہاں پہنچے۔ موقع پر ڈیرک او برائن اور بیشوانر چٹوپادھیائے جیسے اہم رہنماؤں کے ساتھ ابھشیک بنرجی خود موجود تھے۔ اس دوران ابھشیک کے حامیوں اور پولیس کے درمیان شدید دھکم پیل اور جھڑپ ہوئی۔ پولیس نے فرض کی انجام دہی میں رکاوٹ ڈالنے اور پولیس اہلکاروں پر دست درازی کا الزام لگاتے ہوئے ابھشیک کے دفتر سے 12 افراد کو حراست میں لے لیا۔ دوسری جانب، ترنمول کی جانب سے الزام لگایا گیا کہ پولیس نے ذاتی جائیداد میں غیر قانونی طور پر داخل ہو کر خواتین کے ساتھ بدسلوکی کی اور ایک شخص کو ساتویں منزل کی ریلنگ سے نیچے پھینکنے کی کوشش کی۔
جمعرات کی رات میڈیا سے بات کرتے ہوئے ابھشیک بنرجی نے واضح کیا کہ جتنی بار بینر ہٹایا جائے گا، وہ اتنی ہی بار اسے دوبارہ لگائیں گے کیونکہ یہ پچھلے 6-7 سالوں سے کرائے پر لیا گیا دفتر ہے۔ انہوں نے کہا
"ہمیں عدالت اور عدالتی نظام پر پورا اعتماد ہے، اس لیے ہم سپریم کورٹ تک جائیں گے۔ بی جے پی کو خوش کرنے کے لیے آئیں ان تمام پولیس افسران کو معطل کروانے کی پوری کوشش کروں گا جنہوں نے یہ غیر قانونی کام کیا ہے۔ اگر بی جے پی میں طاقت ہے تو ترنمول کو روک کر دکھائے۔"