رام مندر تنازع کے درمیان نصیر الدین شاہ اور انوپم کھیر کی پرانی لفظی جنگ انٹرنیٹ پر دوبارہ زندہ

ممبئی / نئی دہلی: ایودھیا کے رام مندر میں چندے کی مبینہ چوری کے حوالے سے اداکار انوپم کھیر کے حالیہ بیان کے بعد، بالی ووڈ کے دو لیجنڈری اداکاروں کے درمیان پرانی نظریاتی جنگ سوشل میڈیا پر دوبارہ چھڑ گئی ہے۔ سوشل میڈیا پر نصیر الدین شاہ کا ایک پرانا ویڈیو کلپ تیزی سے وائرل ہو رہا ہے، جس میں وہ انوپم کھیر کے سیاسی خیالات پر تنقید کرتے ہوئے انہیں "مسخرہ" کہتے نظر آ رہے ہیں۔ یہ معاملہ اس وقت گرم ہوا جب انوپم کھیر نے 'انڈیا ٹوڈے' کو دیے گئے ایک انٹرویو میں رام مندر میں ہونے والی مبینہ چوری کو ایک "بہت چھوٹا مسئلہ" قرار دیا اور اس کا موازنہ مغل دور میں مندروں پر ہونے والے حملوں اور لوٹ مار سے کیا۔ انوپم کھیر کا یہ تبصرہ وائرل ہوتے ہی، سوشل میڈیا صارفین نے 2020 کا نصیر الدین شاہ کا ایک پرانا انٹرویو کلپ آن لائن شیئر کرنا شروع کر دیا جس میں انہوں نے کھیر پر سخت جملے کسے تھے۔ دوبارہ وائرل ہونے والے اس انٹرویو میں نصیر الدین شاہ سے فلم انڈسٹری کے ان لوگوں کے بارے میں پوچھا گیا تھا جو حکومت کی مبینہ امتیازی سیاست کے خلاف بولتے ہیں، اور ان کے بارے میں جو حکومت کی کھل کر حمایت کرتے ہیں۔ سوال کا جواب دیتے ہوئے نصیر الدین شاہ نے کہا تھا کہ حکومت کی مخالفت کرنے والے لوگ کم ہیں۔ انہوں نے انوپم کھیر کا نام لیتے ہوئے کہا: "انوپم کھیر جیسے لوگ (حکومت کے حق میں) بہت زیادہ بولتے ہیں۔ مجھے نہیں لگتا کہ انہیں سنجیدگی سے لینے کی ضرورت ہے۔ وہ ایک مسخرہ ہے۔ نیشنل اسکول آف ڈراما اور فلم اینڈ ٹیلی ویژن انسٹی ٹیوٹ میں ان کے دور کا کوئی بھی ساتھی ان کی اس چاپلوسانہ فطرت کی تصدیق کر سکتا ہے۔ یہ چیز ان کے خون میں شامل ہے، وہ خود کو روک نہیں سکتے۔" نصیر الدین شاہ کے اس تیکھے حملے پر اس وقت انوپم کھیر نے اپنے سوشل میڈیا اکاؤنٹ 'ایکس' (سابقہ ٹویٹر) پر ایک ویڈیو پیغام جاری کرتے ہوئے پلٹ وار کیا تھا۔ انہوں نے کہا تھا کہ نصیر الدین شاہ کو فلم انڈسٹری کے دیگر لوگوں پر تنقید کرنے کی پرانی عادت ہے۔ انوپم کھیر نے اپنے ویڈیو پیغام میں کہا: "نصیر صاحب، اگرچہ میں نے آپ کے بارے میں کبھی کوئی بری بات نہیں کہی، لیکن آج ضرور کہوں گا۔ آپ نے زندگی میں اتنی بڑی کامیابیاں حاصل کرنے کے باوجود اپنی پوری زندگی مایوسی اور ناامیدی میں گزاری ہے۔ اگر آپ دلیپ کمار صاحب، امیتابھ بچن، راجیش کھنہ، شاہ رخ خان اور ویرات کوہلی جیسی عظیم شخصیات پر تنقید کر سکتے ہیں، تو مجھے خوشی ہے کہ میرا نام بھی ان بڑے لوگوں کے ساتھ لیا جا رہا ہے۔" کھیر نے مزید طنز کرتے ہوئے کہا تھا، "ان میں سے کسی نے بھی آپ کے بیانات کو کبھی سنجیدگی سے نہیں لیا۔ ہم سب جانتے ہیں کہ برسوں سے جن چیزوں اور مادوں کا آپ استعمال کر رہے ہیں، اس کی وجہ سے آپ کو صحیح اور غلط کے درمیان فرق کا احساس ہی نہیں رہا۔" غور طلب ہے کہ انڈیا ٹوڈے کو دیے گئے حالیہ انٹرویو کے دوران جب انوپم کھیر سے ایودھیا رام مندر میں چندے کی چوری سے متعلق سوال پوچھا گیا، تو انہوں نے تاریخ کا حوالہ دیتے ہوئے کہا کہ ماضی میں مندروں کو جس طرح لوٹا اور تباہ کیا گیا، اس تاریخی پس منظر کے سامنے موجودہ چوری کا یہ واقعہ انتہائی معمولی اور غیر اہم ہے۔ ان کے اسی بیان نے اب انٹرنیٹ پر ایک نئی بحث چھیڑ دی ہے۔

Source: social media