نئی دہلی: رات تقریباً ڈھائی بجے راجیہ سبھا میں بھی وقف ترمیمی بل پاس ہوگیا۔اس بل کی حمایت میں مودی حکومت کو128 ووٹ ملے، جبکہ اس کے خلاف اپوزیشن95 ووٹ جٹا پائی۔حالانکہ ووٹنگ میں حصہ کیلئے کانگریس کی معمر رہنما سونیا گاندھی بھی رات گئے تک ایوان میں موجود رہیں۔ تاہم مودی حکومت کو یہ بل پاس کرانے کیلئے سخت جدوجہد کرنا پڑا۔دوپہر 12 بجے راجیہ سبھا میں اقلیتی امور کے وزےر کرن رجیجو نے وقف بل پیش کیا، دن بھراس پرلگاتار بحث ہوتی رہی۔ اپوزیشن جماعتوں کے اراکین نے وقف بل میں ترمیمات کے منفی پہلوﺅں کو اجاگر کیا اور مسلمانوں کی تشویش سے ایوان کو آگاہ کیا۔ لیکن بی جے پی اور اس کی حلیف جماعتوں کے اراکین بل کے نقصاندہ پہلوﺅں کو دباتے رہے۔ رات سوا اےک بجے سے بل میں ترمیمات کے تجاویز پر راجیہ سبھا کے چئیر مین جگدیپ دھنکر نے پیش کیا۔ لیکن صوتی ووٹنگ کی بنیاد پر اپوزیشن کی جا نب سے پیش کردہ سبھی ترمیمات کو مسترد کردیا گیا۔جبکہ ڈھائی بجے راجیہ سبھا چئیر مین جگدیپ دھنکر نے وقف ترمیمی بل کو منظور کئے جانے کا اعلان کیا۔ تاہم اس کے بعد بھی ایوان کی کارروائی چلتی رہی اور منی پور معاملہ سے متعلق ایک بل پر بحث شروع کرادی گئی۔جس سے پارلیمنٹ کی کارروائی رات گئے تےن بجے کے بعد بھی چلتی رہی۔

Source: social media