پاکستان کی فضائی حدود میں داخل ہونے کے معاملے میں ایئر انڈیا کے پائلٹ، ایئر ٹریفک کنٹرولر پر کارروائی

نئی دہلی، 24 جون : ایئر انڈیا کے ایک طیارے کے پاکستان کی فضائی حدود میں داخل ہونے کے واقعے میں دونوں پائلٹوں اور امرتسر ہوائی اڈے پر اس وقت ڈیوٹی پر تعینات ایئر ٹریفک کنٹرولر پر عبوری کارروائی کی گئی ہے ۔ ڈائریکٹوریٹ جنرل آف سول ایوی ایشن (ڈی جی سی اے ) نے بتایا کہ عملے کے ارکان اور ایئر ٹریفک کنٹرولر نے اس واقعے کی رپورٹ متعلقہ ریگولیٹرز کو نہیں دی، اس لیے ان پر یہ کارروائی کی گئی ہے ۔ ذرائع کا کہنا ہے کہ انہیں ڈیوٹی سے ہٹا دیا گیا ہے ۔ ڈی جی سی اے کی جانب سے جاری کردہ بیان میں کہا گیا ہے کہ ایئر انڈیا کی پرواز نمبر اے آئی-479 جو 22 جون کو دہلی سے امرتسر پہنچی تھی، وہ کچھ وقت کے لیے پاکستان کی فضائی حدود میں چلی گئی تھی۔ یہ ایئربس کا اے 321 طیارہ (رجسٹریشن نمبر وی ٹی-پی پی وی) تھا۔ اپروچ کے دوران پائلٹ سے ہولڈ کرنے کے لیے کہا گیا تھا کیونکہ کسی دوسرے طیارے سے پرندے کے ٹکرانے کے واقعے کے بعد رن وے کا معائنہ کیا جا رہا تھا۔ جب بعد میں ایئر انڈیا کے طیارے نے اترنے کے لیے اپروچ کرنا شروع کیا تو وہ کچھ دیر کے لیے پاکستانی فضائی حدود میں داخل ہو گیا۔ ڈی جی سی اے نے کہا کہ واقعے کے سلسلے میں پاکستان اے ٹی سی کے حکام کے ساتھ تال میل کیا گیا تھا۔ بعد میں پرواز دہلی واپس آگئی۔ ریگولیٹر نے بتایا کہ "واقعے کی رپورٹنگ نہ کرنے کی وجہ سے " متعلقہ ایئر ٹریفک کنٹرولر اور عملے کے ارکان پر عبوری کارروائی کی گئی ہے ۔ ایئر انڈیا کے ایک ترجمان نے بتایا کہ واقعے کی اطلاع ریگولیٹری ایجنسیوں کو دے دی گئی ہے ۔ ساتھ ہی معاملے کی اندرونی جانچ بھی کی جا رہی ہے ۔ انہوں نے کہا کہ ایئر انڈیا کے لیے مسافروں اور عملے کی حفاظت پہلی ترجیح ہے ۔

Source: UNI NEWS