برصغیر ہند و پاک میں 7 جون کو پورے جوش و خروش کے ساتھ لوگ عید الاضحیٰ کا تہوار منانے میں مصروف ہیں۔ لیکن بلوچ لبریشن آرمی (بی ایل اے) نے گزشتہ 24 گھنٹوں کے اندر پاکستان میں متعدد مقامات پر فوج کو نشانہ بنایا، جس سے عید کی خوشی ماتم میں تبدیل ہو گئی ہے۔ ان حملوں میں پاکستان کے 12 فوجی جاں بحق ہوئے ہیں۔ ان حملوں میں پاکستانی فوجیوں کے علاوہ ایک پاکستانی خفیہ ایجنٹ بھی مارا گیا ہے۔ بی ایل اے نے بلوچستان کے کئی اضلاع میں ہوئے حملوں کی ذمہ داری قبول کر لی ہے۔ بی ایل اے کے ترجمان نے کہا کہ ان کے جنگجوؤں نے نوشکی، قلات، مستونگ اور کوئٹہ میں 4 الگ الگ حملے کیے، جس میں آئی ای ڈی، چھوٹے اسلحوں سے فائرنگ اور گرینیڈ حملے شامل تھے۔ ساتھ ہی بی ایل اے نے ایک مقامی خفیہ افسر کے قتل کو پاکستانی فوج کی کارروائیوں کا بدلہ قرار دیا ہے۔ بی ایل اے ترجمان نے بتایا کہ ایک حملہ نوشکی کے دو سائی علاقہ میں کیا گیا۔ بی ایل اے نے یہاں 2 فوجی گاڑیوں کو نشانہ بنایا تھا۔ دوسرا حملہ قلات میں ہوا، جہاں جنگجوؤں نے منگوچر کے ایک کالج کیمپس کے احاطے کے اندر واقع چوکی پر مبینہ طور پر حملہ کیا۔ اس حملہ میں 3 فوجی ہلاک ہوئے اور کم از کم 4 فوجی زخمی ہوئے۔ تیسرا حملہ مستونگ میں ہوا، سی سی ایم کراس پر واقع ایک فوجی چوکی پر گرینیڈ سے حملہ کیا گیا، جس میں 3 اہلکار زخمی ہو گئے۔ ساتھ ہی بی ایل اے نے کوئٹہ کے کرانی روڈ رہائشی گلزار نصیر دہوار کی ٹارگٹ کلنگ کی ذمہ داری بھی قبول کی۔ اس کے بارے میں کہا جاتا ہے کہ وہ پاکستانی ملٹری انٹیلی جنس کے ایجنٹ کے طور پر کام کر رہا تھا۔ قابل ذکر ہے کہ بلوچستان میں گزشتہ چند ماہ سے علیحدگی کی تحریک میں تیزی آئی ہے۔ یہی وجہ ہے کہ مسلسل پاکستانی فوج پر حملے کیے جا رہے ہیں۔ اس میں سب سے بڑا حملہ رواں سال مارچ میں جعفر ایکسپریس پر کیا گیا حملہ تھا۔ اس کے کچھ دنوں بعد ہی پاکستانی فوج کے جوانوں کو لے جا رہی بس کو دھماکے سے اڑا دیا گیا تھا۔ اس وقت بی ایل اے نے دعویٰ کیا تھا کہ حملہ میں 90 جوانوں کی موت ہوئی ہے۔ پاکستان میں بلوچ لبریشن آرمی (بی ایل اے) کی بڑھتی ہوئی طاقت حکومت کے لیے ایک نیا چیلنج کھڑا کر دیا ہے۔

Source: social media