حماس کے عسکری ونگ "القسام بریگیڈز" کے ترجمان نے خبردار کیا ہے کہ اسرائیلی فوج نے غزہ میں اس مقام کا محاصرہ کر لیا ہے جہاں اسرائیلی قیدی "متان تسنجاوکر" کو رکھا گیا ہے، مگر وہ اسے زندہ واپس نہیں لا سکے گی۔ ترجمان "ابو عبیدہ" نے جاری ایک آڈیو بیان میں واضح کیا "ہم پورے یقین کے ساتھ کہتے ہیں کہ اسرائیل اپنے قیدی کو زندہ بازیاب نہیں کرا سکے گا"۔ ابو عبیدہ نے مزید کہا کہ "اگر قیدی کی رہائی کی کوشش کے دوران اس کی موت واقع ہوتی ہے تو اس کی مکمل ذمہ دار اسرائیلی فوج ہو گی، کیونکہ القسام نے اسے ایک سال اور آٹھ ماہ تک زندہ رکھا"۔ ادھر اسرائیلی وزیر دفاع "یسرائیل کاٹز" نے ہفتے کے روز اعلان کیا کہ فوج نے غزہ سے ایک تھائی قیدی"ناتابونگ بینتا" کی لاش بازیاب کر لی ہے، جو سات اکتوبر 2023 کو حماس کے حملے کے بعد سے لاپتہ تھا۔ انہوں نے مزید کہا کہ حکومت اس وقت تک چین سے نہیں بیٹھے گی جب تک تمام زندہ قیدی اور جاں بحق افراد کی لاشیں واپس نہیں لائی جاتیں۔ گذشتہ جمعرات بھی اسرائیلی فوج نے دو قیدیوں "جودی وینسٹائن-ہاگی" اور "گیڈی ہاگی" کی لاشیں بازیاب کی تھیں۔ یاد رہے کہ اسرائیلی وزیراعظم بنجمن نیتن یاھو نے گذشتہ ماہ کے آغاز میں انکشاف کیا تھا کہ غزہ میں 21 اسرائیلی قیدی زندہ ہیں، جب کہ اسرائیلی حکومت کے قیدیوں اور لاپتہ افراد کے رابطہ کار گال ہیرش کا کہنا تھا کہ زندہ قیدیوں کی تعداد 24 ہے اور اس میں کوئی تبدیلی نہیں آئی۔ سرکاری اسرائیلی اندازوں کے مطابق 7 اکتوبر 2023 کے بعد سے اب تک 35 اسرائیلی قیدی مارے جا چکے ہیں۔

Source: social media