’وزیر اعظم کو اسرائیل جانے کی ضرورت نہیں تھی‘، کانگریس نے موجودہ حالات کے لیے پی ایم مودی کو ٹھہرایا ذمہ دار

مشرق وسطیٰ میں پیدا کشیدہ حالات نے ہندوستان میں ایل پی جی کی قلت پیدا کر دی ہے۔ اس قلت نے عوام کے ساتھ ساتھ سیاسی لیڈران میں بھی فکر پیدا کر دی ہے۔ یہ فکر آج راجیہ سبھا میں کانگریس رکن شکتی سنگھ گوہل کے ایک بیان میں بھی دیکھنے کو ملی۔ انھوں نے ایوان میں اپنی بات رکھتے ہوئے کہا کہ ’’ہمارے ملک میں ایل پی جی کی قلت ہو رہی ہے۔ ہمارا سپلائی چین ڈسٹرب ہو گیا ہے۔ یہ ایک ’مین میڈ کرائسس‘ (انسان کے ذریعہ پیدا کردہ بحران) ہے۔‘‘ شکتی سنگھ گوہل نے یہ بیان ’اختصاصی بل 2026‘ پر پانی بات رکھتے ہوئے دیا۔ انھوں نے آئین کا حوالہ دیتے ہوئے کہا کہ ’’جب ہمارا آئین بنا تو صاف کہا گیا تھا کہ ہندوستان کسی دیگر ملک کے معاملوں میں مداخلت نہیں کرے گا، لیکن آج یہ ساری باتیں فراموش کر دی گئی ہیں۔‘‘ وہ مزید کہتے ہیں کہ ’’ہمارا ایران کے ساتھ ایک پرانا اور اچھا رشتہ تھا، ایسے میں ان سنگین حالات میں وزیر اعظم کو اسرائیل جانے کی ضرورت نہیں تھی۔‘‘ انھوں نے یہ بھی کہا کہ ’’آج ملک کو جن حالات کا سامنا ہے، وہ مودی حکومت کی ناکام خارجہ پالیسی کا نتیجہ ہے۔‘‘ دوسری طرف کیرالہ میں تہواروں کے مدنظر رسوئی گیس کی بڑھتی طلب کو پیش نظر رکھتے ہوئے ریاستی حکومت نے مرکز سے خصوصی انتظام کرنے کا مطالبہ کیا ہے۔ کیرالہ کے وزیر اعلیٰ پینارائی وجین نے وزیر اعظم نریندر مودی کو اس تعلق سے ایک خط لکھا ہے، جس میں گزارش کی گئی ہے کہ 2 ماہ کے لیے ریاست کے ہر گھر کو ایک اضایف گھریلو ایل پی جی سلنڈر دینے کی اجازت دی جائے۔ ان کا کہنا ہے کہ رمضان، ایسٹر اور ویشو جیسے بڑے تہوار ایک ساتھ آنے سے گیس کی طلب تیزی سے بڑھنے والی ہے۔ قابل ذکر ہے کہ ایل پی جی سلنڈر کی قلت پورے ملک میں دیکھنے کو مل رہی ہے۔ کچھ ریاستوں میں حالات اتنے خراب ہیں کہ ریسٹورینٹ اور ہوٹلز بڑی تعداد میں بند ہو گئے ہیں۔ کچھ ہوٹلوں میں کھانے مہنگی قیمتوں میں فروخت کیے جا رہے ہیں، جبکہ کچھ بڑے ہوٹلوں میں کھانے کے مینو ہی بدل دیے گئے ہیں۔ عام لوگوں کی حالت تو انتہائی دگرگوں ہے، کیونکہ کئی ریاستوں میں ایل پی جی کے لیے طویل قطاریں لگی ہوئی دکھائی دے رہی ہیں۔ حالات کچھ ایسے ہیں کہ لوگ آپس میں لڑنے جھگڑنے پر بھی آمادہ ہیں۔ حالانکہ حکومت کا کہنا ہے کہ یہ حالات صرف گمراہ کن خبروں کی وجہ سے پیدا ہوئے ہیں۔ اپوزیشن پارٹیاں اس معاملہ میں برسراقتدار طبقہ سے سخت ناراض دکھائی دے رہی ہیں۔ ان کا کہنا ہے کہ بحران والے حالات غلط پالیسیوں کی وجہ سے پیدا ہوئے ہیں، اور اب حکومت جھوٹ کہہ رہی ہے کہ ایل پی جی کی قلت نہیں ہے۔

Source: social media