عمر عبداللہ نے ترنگے رنگ کا ربن کاٹنے سے کیا انکار، سوشل میڈیا پر ویڈیو وائرل

جموں و کشمیر کے وزیر اعلیٰ عمر عبداللہ نے بدھ کے روز ایک پروگرام کے دوران اپنی دانشمندی کا مظاہرہ کرتے ہوئے قومی پرچم کے رنگوں والے ربن کو کاٹنے سے انکار کر دیا۔ یہ واقعہ سری نگر کے کشمیر ہاٹ، ایگزیبیشن گراؤنڈ میں منعقدہ ’اپنے کاریگر کو جانیے‘ پروگرام کے افتتاح کے دوران پیش آیا۔ جب وزیر اعلیٰ افتتاحی مقام پر پہنچے تو انہوں نے دیکھا کہ ربن ترنگے کے رنگوں (زعفرانی، سفید اور سبز) پر مشتمل ہے۔ یہ دیکھتے ہی انہوں نے ربن کاٹنے سے انکار کر دیا۔ اس کے بجائے انہوں نے منتظمین کو ہدایت دی کہ ربن کو ایک طرف سے کھول دیا جائے، جس کے بعد پروگرام کا افتتاح کیا گیا۔ اس موقع پر ان کے ساتھ نائب وزیر اعلیٰ سریندر کمار چودھری، وزیر اعلیٰ کے مشیر ناصر اسلم وانی، کئی اراکین اسمبلی اور انتظامیہ کے سینئر افسران بھی موجود تھے۔ وزیر اعلیٰ کے اس اقدام کو قومی پرچم کے احترام اور ضابطوں کی پابندی کے طور پر دیکھا جا رہا ہے۔ مانا جاتا ہے کہ ترنگے سے متعلق قواعد و ضوابط کا احترام کرنا انتہائی ضروری ہے اور عمر عبداللہ نے اسی بات کو مدنظر رکھتے ہوئے یہ فیصلہ کیا۔ اس واقعے کی ویڈیو بھی سوشل میڈیا پر وائرل ہو رہی ہے۔ عمر عبداللہ کو پہلے بھی قومی پرچم، قومی ترانہ اور پروٹوکول سے متعلق معاملات میں حساس اور محتاط رہنما کے طور پر جانا جاتا ہے۔

Source: social media