وائیکو نے وجے کی ٹی وی کے کی حمایت کے ایم ڈی ایم کے کے فیصلے کا دفاع کیا

چنئی، 27 جون: تمل ناڈو میں مروملارچی دراوڑ منیترا کزگم (ایم ڈی ایم کے ) کے جنرل سکریٹری وائیکو نے دراوڑ منیترا کزگم (ڈی ایم کے ) کے ساتھ اپنی نو سالہ سیاسی اتحاد ختم کرتے ہوئے وزیر اعلیٰ تھلپتی وجے کی جماعت تملگا ویٹری کزگم (ٹی وی کے ) کی حمایت کے فیصلے کو درست قرار دیا ہے ۔ ایم ڈی ایم کے کی جنرل کونسل کے اجلاس کے بعد صحافیوں سے گفتگو کرتے ہوئے وائیکو نے ڈی ایم کے اتحاد سے علیحدگی کی قرارداد کے بارے میں معلومات دیں۔ انہوں نے کہا کہ تھلپتی وجے نے یقین دہانی کرائی تھی کہ ان کی پارٹی کے دو ارکانِ اسمبلی، جو گزشتہ انتخابات میں ڈی ایم کے کے انتخابی نشان پر کامیاب ہوئے تھے ، ضمنی انتخابات میں دوبارہ منتخب کرائے جائیں گے ۔ اس کے باوجود ایم ڈی ایم کے نے فیصلہ کیا ہے کہ بلدیاتی انتخابات میں ٹی وی کے کے ساتھ دوستانہ تعلقات برقرار رکھے جائیں گے اور ریاست میں ہونے والے پانچ اسمبلی ضمنی انتخابات میں اس کی حمایت کی جائے گی۔ وائیکو نے تصدیق کی کہ سرکازی حلقے سے منتخب ہونے والے دو ارکانِ اسمبلی میں سے ایک سینتھل سیلوان نے پارٹی چھوڑ کر ڈی ایم کے کے ساتھ رہنے کا فیصلہ کیا ہے ، جبکہ کدایانالور سے منتخب رکن اسمبلی ٹی ایم راجیندرن بدستور ایم ڈی ایم کے کے ساتھ ہیں۔ انہوں نے یہ واضح نہیں کیا کہ آیا دونوں ارکان اسمبلی اپنی نشستوں سے استعفیٰ دیں گے یا نہیں، تاہم پارٹی ذرائع کا کہنا ہے کہ چونکہ ایم ڈی ایم کے نے ڈی ایم کے اتحاد سے علیحدگی اختیار کر لی ہے ، اس لیے استعفوں کا امکان موجود ہے ۔

Source: UNI NEWS