بیس سال میں پہلی بار نتیش کے پاس داخلہ محکمہ نہیں رہا، بی جے پی کے سمراٹ چودھری کو مل گیا

نتیش کابینہ میں قلمدانوں یعنی محکموں کی تقسیم ہو گئی ہے۔ وزارت داخلہ کے لیے جنتا دل یو اور بی جے پی میں رسہ کشی کی خبریں سامنے آ رہی تھیں، جس میں فتح بی جے پی کو ہاتھ لگی ہے۔ یعنی وزارت داخلہ بی جے پی کے حصہ میں چلی گئی ہے۔ سمراٹ چودھری کو وزارت داخلہ، سنجے ٹائیگر کو وزارت محنت وسائل، منگل پانڈے کو وزارت صحت و قانون، سریندر مہتا کو وزارت مویشی و ماہی وسائل اور نتن نوین کو وزارت سڑک تعمیرات کی ذمہ داری ملی ہے۔ بی جے پی کی نمائندگی کرنے والے چودھری اب نتیش کمار حکومت میں امن و امان اور داخلی سلامتی کی نگرانی کریں گے۔20 سالوں میں یہ پہلا موقع ہے جب نتیش کمار نے محکمہ داخلہ برقرار نہیں رکھا ہے۔ دیگر اہم لیڈران کی بات کریں تو وجئے کمار سنہا کو وزارت برائے کانکنی، دلیپ جیسوال کو وزارت صنعت، رام کرپال یادو کو وزارت زراعت، شریئسی سنگھ کو وزارت کھیل و یوتھ اور ارون شنکر پرساد کو وزارت سیاحت و آرٹس کا ذمہ سونپا گیا ہے۔ غور کرنے والی بات یہ ہے کہ نتیش کمار کے وزیر اعلیٰ رہتے ہوئے ایسا پہلی بار ہوا ہے جب وزارت داخلہ ان کے پاس نہیں ہے۔ محکمہ گنا صنعت و محکمہ عوامی صحت ایل جے پی (رام ولاس) کے حصہ میں گیا ہے، جبکہ محکمہ مائنر آبی وسائل ہندوستانی عوام مورچہ اور محکمہ پنچایتی راج راشٹریہ لوک مورچہ کے حصہ میں گیا ہے۔

Source: social media