نوجوان کا اغوا کر کے غیر انسانی اذیت، برہنہ کر کے مار پیٹ اور چہرے پر پیشاب؛ ویڈیو وائرل

بھوپال، 29 اپریل :: مدھیہ پردیش کے دارالحکومت بھوپال میں غلبہ حاصل کرنے کی لڑائی کے دوران ایک نوجوان پر غیر انسانی مظالم کا سنسنی خیز معاملہ سامنے آیا ہے ۔ کملا نگر اور ہنومان گنج تھانہ علاقوں سے جڑے اس واقعے میں بدمعاشوں نے ایک نوجوان کو اغوا کر کے اسے برہنہ کیا، بیلٹ، لاتوں اور گھونسوں سے بے رحمی سے پیٹا اور اس کے چہرے پر پیشاب کر دیا۔ واقعے کی ویڈیو سوشل میڈیا پر وائرل ہونے کے بعد یہ معاملہ سرخیوں میں آ گیا ہے ۔ پولیس ذرائع کے مطابق یہ واقعہ ہفتہ کا بتایا جا رہا ہے ، جبکہ شکایت پہلے کملا نگر تھانے میں درج کرائی گئی تھی۔ تفتیش کے دوران جائے وقوعہ ہنومان گنج تھانہ علاقے کا پائے جانے پر مقدمہ وہاں منتقل کر دیا گیا، جہاں منگل کی دیر رات رپورٹ درج کی گئی۔ بتایا گیا ہے کہ ملزمان نے نوجوان کو بہانے سے نادرا بس اسٹینڈ بلایا، جہاں سے اسے اغوا کر کے سنسان جگہ لے گئے اور تشدد کا نشانہ بنایا۔ اس دوران نوجوان رحم کی بھیک مانگتا رہا، لیکن ملزمان نے اسے زمین پر پٹخ کر برہنہ کر دیا اور بیلٹ و لاتوں سے پیٹتے رہے ۔ الزام ہے کہ بدمعاشوں نے اس پر چاقو سے حملے بھی کیے ۔واقعے کے دوران نوجوان نے پانی مانگا تو ملزمان نے اس کے چہرے پر پیشاب کر دیا اور دہشت پھیلانے کے مقصد سے پوری واردات کی ویڈیو بنا کر سوشل میڈیا پر اپ لوڈ کر دی۔ ہنومان گنج تھانہ انچارج کے مطابق ابتدائی بیان میں متاثرہ نوجوان نے چہرے پر پیشاب کیے جانے کا ذکر نہیں کیا تھا، بعد میں ویڈیو سامنے آنے پر یہ حقیقت اجاگر ہوئی۔ پولیس نے چاقو زنی سمیت دیگر دفعات کے تحت مقدمہ درج کر لیا ہے ، تاہم اب تک ملزمان کی گرفتاری عمل میں نہیں آ سکی ہے ۔

Source: UNI NEWS