پیرس، 25 جولائی : ہندستانی تیر اندازوں کی خواتین اور مردوں کی ٹیمیں جمعرات کو اپنی شاندار کارکردگی کے ساتھ پیرس اولمپکس 2024 کے کوارٹر فائنل میں پہنچ گئی ہے۔ آج یہاں لیس انویلیڈس گارڈنز میں کوالیفکیشن راؤنڈ میں ہندستانی مرد ٹیم 2013 پوائنٹس کے ساتھ تیسرے نمبر پر رہی۔ کوارٹر فائنل میں ہندستان کا مقابلہ ترکی اور کولمبیا کے درمیان ہونے والے میچ کی فاتح ٹیم سے ہوگا۔ مردوں کے زمرے میں، دھیرج بومادیورا مردوں کی رینکنگ راؤنڈ میں چوتھے نمبر پر رہے۔ دھیرج 681 نمبروں کے ساتھ چوتھے نمبر پر رہے۔ انفرادی ایونٹ میں ان کا مقابلہ 61ویں نمبر کے کھلاڑی سے ہوگا۔ اس میچ میں تروندیپ رائے 674 کے اسکور کے ساتھ 14 ویں نمبر پر رہے۔ ان کا مقابلہ 51ویں نمبر کے تیر انداز سے ہوگا۔ پروین رمیش جادھو نے 658 کے اسکور کے ساتھ 39 واں مقام حاصل کیا۔ ان کا مقابلہ 26 نمبر کے کھلاڑی سے ہوگا۔ مرد تیر اندازوں نے 72 میں سے 36 تیر نشانے پر لگائے۔ اس ایونٹ میں تروندیپ رائے 337 کے اسکور کے ساتھ 14 ویں مقام پر ہیں۔ ان کی کارکردگی اب تک کی بہترین رہی ہے۔ وہیں دھیرج 335 کے اسکور کے ساتھ 24 ویں نمبر پر پہنچ گئے ہیں۔ انہوں نے اچھی شروعات کی لیکن اسے برقرار نہیں رکھ سکے۔ پروین جادھو 328 کے اسکور کے ساتھ 37 ویں نمبر پر ہیں۔ خواتین کے انفرادی رینکنگ راؤنڈ میں، انکیتا اپنے سیزن کے بہترین اسکور 666 کے ساتھ 11 ویں، بھجن 659 کے اسکور کے ساتھ 22 ویں اور دیپیکا 658 کے اسکور کے ساتھ 23 ویں نمبر پر رہیں۔ کوریا کے سیہیون 694 کے اسکور کے ساتھ پہلے، سوہیون نام 688 کے اسکور کے ساتھ دوسرے اور چین کے شیاؤلی یانگ 673 کے اسکور کے ساتھ تیسرے نمبر پر رہیں۔ انکیتا بھکت، بھجن کور اور دیپیکا کماری 1983 کے اسکور کے ساتھ ٹیم ایونٹ میں براہ راست کوارٹر فائنل میں پہنچ گئیں۔ ہندوستانی ٹیم رینکنگ راؤنڈ میں چوتھے نمبر پر رہی۔ ہندوستانی خواتین کی ٹیم فرانس اور ہالینڈ کی فاتح سے کھیلے گی۔ جنوبی کوریا 2046 کے اسکور کے ساتھ پہلے، چین 1996 کے اسکور کے ساتھ دوسرے اور میکسیکو نے 1986 کے اسکور کے ساتھ تیسرا مقام حاصل کیا۔

Source: uni news service