ہندستان افغان عوام کا دوسرا گھر ہے : طالبانی وزیرمولوی جلالی

نئی دہلی، 20 دسمبر : ہندستان کے دورے پر آئے ہوئے افغانستان میں طالبان حکومت کے وزیر صحت مولوی نور جلال جلالی نے ہفتے کے روز کہا کہ ہندستان ہمیشہ سے افغانوں کے لیے دوسرا گھر رہا ہے ۔ مولوی جلالی یہاں پی ایچ ڈی چیمبر آف کامرس اینڈ انڈسٹری (پی ایچ ڈی سی سی سی آئی) کے زیر اہتمام ایک تقریب سے خطاب کر رہے تھے ۔ ان کے ہمراہ افغانستان کا ایک اعلیٰ سطحی تجارتی وفد بھی تھا۔ مسٹر جلالی نے دونوں ممالک کے درمیان گہرے تاریخی تعلقات کو اجاگر کرتے ہوئے کہاکہ "ہندوستان ہمیشہ سے افغان عوام کے لیے دوسرا گھر رہا ہے اور ہم یہ مانتے ہیں کہ ہندوستانی ہمارے طویل عرصے سے کھوئے ہوئے بھائیوں کی طرح ہیں۔" پی ایچ ڈی سی سی آئی کی ایک ریلیز کے مطابق اس تقریب میں ہندستان اور افغانستان کی شراکت داری کو مضبوط بنانے ، خاص طور پر دوا سازی اور صحت کے شعبوں میں تعاون کو فروغ دینے پر تبادلہ خیال کیا گیا۔ انہوں نے افغانستان کے مستقبل کی ایک پُرامید تصویر پیش کرتے ہوئے کہا کہ "افغانستان کو طویل عرصے سے غیر یقینی صورتحال کا سامنا ہے ، لیکن آج ملک امن کی طرف بڑھ رہا ہے اور خوشحالی کی جانب بتدریج کام کر رہا ہے ۔"

Source: uni news