ہند-امریکہ تجارتی معاہدہ کسانوں کے لیے نقصان دہ ہو سکتا ہے : شرد پوار

بارامتی ، 4 فروری:نیشنلسٹ کانگریس پارٹی (شردچندرا پوار دھڑا) کے صدر شرد پوار نے بدھ کو خبردار کیا کہ بھارت اور امریکہ کے درمیان ہونے والا نیا تجارتی معاہدہ مستقبل قریب میں ہندوستانی کسانوں اور زرعی شعبے کے لیے نقصان دہ ثابت ہو سکتا ہے ۔ ایک پریس کانفرنس سے خطاب کرتے ہوئے انہوں نے کہا کہ اگرچہ معاہدے کا مکمل مسودہ ابھی منظرِ عام پر نہیں آیا، تاہم اب تک دستیاب معلومات کسانوں کے لیے تشویش کا باعث ہیں۔ شرد پوار نے بتایا کہ اطلاعات کے مطابق امریکہ نے بھارت سے برآمد ہونے والی اشیاءپر ٹیرف میں کمی کا فیصلہ کیا ہے ، جو ایک مثبت قدم ہے ، لیکن اس کے بدلے بھارت کی جانب سے کن رعایتوں پر اتفاق ہوا ہے ، اس حوالے سے صورتِ حال واضح نہیں۔ انہوں نے کہا کہ موجودہ رپورٹس کے مطابق اس معاہدے کے تحت امریکہ کو اپنی زرعی مصنوعات بھارت بھیجنے کی اجازت دی جا سکتی ہے ۔ انہوں نے اس خدشے کا اظہار کیا کہ چونکہ امریکہ ایک معاشی سپر پاور ہے ، اگر وہ بڑے پیمانے پر اپنی مخصوص زرعی اجناس بھارت میں برآمد کرنا شروع کرتا ہے تو اس سے ملکی منڈی میں عدم توازن پیدا ہو سکتا ہے اور مقامی کسانوں کو شدید نقصان پہنچ سکتا ہے ۔ شرد پوار نے کہا کہ مکمل تصویر سامنے آنے کے بعد ہی وہ اس پر مزید تبصرہ کریں گے ۔ شرد پوار نے مرکزی بجٹ پر بھی اظہارِ خیال کیا۔ انہوں نے کہا کہ اپنے 58 سالہ سیاسی کیریئر میں، جس میں مہاراشٹر اسمبلی، لوک سبھا اور راجیہ سبھا شامل ہیں، وہ کبھی بھی بجٹ پیشی کے موقع پر دہلی جانے سے محروم نہیں رہے ، لیکن اجیت پوار کے حادثے کے باعث وہ اس بار دہلی نہ جا سکے ۔ انہوں نے اطمینان کا اظہار کیا کہ بجٹ میں کوئی ایسا نیا ٹیکس نہیں لگایا گیا جس سے عام آدمی پریشان ہو، تاہم ترقی کی رفتار تیز کرنے کے لیے مزید ٹھوس اقدامات کی ضرورت ہے ۔ سیاسی صورتحال پر بات کرتے ہوئے ، جب ان سے سنیترا پوار کی جانب سے حادثے کے فوراً بعد نائب وزیر اعلیٰ کے عہدے کا حلف لینے سے متعلق سوال کیا گیا، تو شرد پوار نے اس موضوع پر کوئی تبصرہ کرنے سے انکار کیا اور کہا کہ وہ اس بارے میں کچھ نہیں کہنا چاہتے ۔ این سی پی کے دونوں دھڑوں کے ممکنہ انضمام کے معاملے پر شرد پوار نے وزیر اعلیٰ دیویندر فڑنویس کے بیان پر تنقید کی۔ انہوں نے واضح کیا کہ فڑنویس اس انضمام سے متعلق بات چیت کا حصہ نہیں تھے ، اس لیے انہیں اس پر تبصرہ کرنے کا کوئی حق نہیں۔ شرد پوار نے دہرایا کہ یہ مذاکرات جینت پاٹل اور اجیت پوار کے درمیان ہو رہے تھے ، جس سے ایک بار پھر یہ بات واضح ہوتی ہے کہ این سی پی کے انضمام پر واقعی گفتگو جاری تھی۔

Source: UNI NEWS