نئے سال کی آمد سے قبل ٹونک سے 150 کلو گرام امونیم نائٹریٹ برآمد

ٹونک ڈسٹرکٹ اسپیشل ٹیم (DST) نے بدھ کے روز کہا ہے کہ انہوں نے ایک گاڑی سے 150 کلو گرام امونیم نائٹریٹ برآمد کیا ہے اور وہ اس دھماکہ خیز مواد کی منتقلی کے پیچھے تمام زاویوں سے تحقیقات کر رہے ہیں۔ ٹونک کے ڈپٹی سپرنٹنڈنٹ آف پولیس مرتونجے مشرا نے کہا کہ، "ڈی ایس ٹی انچارج اوم پرکاش کی قیادت میں ڈی ایس ٹی ٹیم نے آج ایک بڑی کارروائی کی ہے۔ ایک ماروتی سیاز کار بوندی سے ٹونک کی طرف آ رہی تھی۔ ڈی ایس ٹی کو گاڑی کے بارے میں اطلاع ملی اور اسے بارونی تھانہ حدود میں روک کر تلاشی لی گئی اور گاڑی سے دھماکہ خیز مواد برآمد کر لیا گیا۔" ڈپٹی ایس پی نے بتایا کہ، "دھماکہ خیز مواد 150 کلو گرام امونیم نائٹریٹ تھا جو یوریا کی بوریوں میں چھپایا گیا تھا۔ اس کے علاوہ پولیس نے 200 دھماکہ خیز کارتوس اور 1,100 میٹر تار بھی قبضے میں لی ہے۔" پولیس نے بوندی کے رہائشی 48 سالہ سریندر ولد بھنور لال اور 35 سالہ سریندر موچی ولد دھولی لال کو گرفتار کر لیا ہے۔ مشرا نے کہا کہ امونیم نائٹریٹ دھماکوں کے لیے استعمال ہوتا ہے اور اس بات کی تفتیش جاری ہے کہ یہ لوگ دھماکہ خیز مواد کیوں اور کہاں سے لا رہے تھے، ساتھ ہی اس کی منزل اور ان کے ساتھ ملوث دیگر افراد کے بارے میں بھی پتہ لگایا جا رہا ہے۔ یہ پوچھے جانے پر کہ کیا یہ کان کنی کے مقاصد کے لیے تھا یا نئے سال کے موقع کے پیش نظر ان کا کوئی اور مقصد تھا، ڈپٹی ایس پی نے کہا کہ تحقیقات جاری ہیں۔ اس سال لال قلعہ دھماکے کے بعد بھی پولیس نے ایک ملزم کے گھر سے بڑی مقدار میں امونیم نائٹریٹ برآمد کیا تھا۔

Source: social media