مہینے کے پہلے ہی دن دے دیا بڑا جھٹکا، 50 روپئے مہنگا ہوگیا کمرشیل گیس سلینڈر

عام بجٹ 2026 پیش ہونے سے پہلے ہی حکومت نے عام لوگوں اور کاروباری اداروں کو بڑا دھچکا دے دیا ہے۔ حکومت نے 19 کلوگرام کمرشیل ایل پی جی سلنڈر کی قیمت میں 50 روپے کا اضافہ کر دیا ہے۔ حالانکہ 14 کلوگرام گھریلو ایل پی جی سلنڈر کی قیمت میں کوئی تبدیلی نہیں کی گئی ہے۔ گھریلو سلنڈر اب بھی 8 اپریل 2025 کو طے شدہ پرانی شرح پر دستیاب ہیں۔ رسوئی گیس کی قیمت میں اضافے کے بعد دہلی میں اب 19 کلو گرام والے ایل پی جی سلنڈر کی قیمت اب 1740.50 روپے ہوگئی ہے۔ کولکتہ میں اس کی قیمت 1844.50 روپے تک بڑھ گئی ہے۔ ممبئی میں یہ اب 1692.00 میں دستیاب ہوگا، جو پہلے 1642.50 روپئے تھا۔ چنئی میں اس کی قیمت اب 1899.50 روپئے ہو گئی ہے۔ وہیں حکومت نے صاف کردیا ہے کہ 50 کا یہ اضافہ کمرشیل سلینڈر پر کیاگیا ہے جن کا استعمال ہوٹلوں، ریستورانوں، ڈھابوں اور دیگر تجارتی سرگرمیوں میں ہوتا ہے۔ گھروں میں استعمال ہونے والے 14.2 کلوگرام ایل پی جی سلنڈر کی قیمت میں کوئی تبدیلی نہیں کی گئی ہے۔ اس میں آخری بار 8 اپریل 2025 کو تبدیلی کی گئی تھی۔ یہ سلینڈر دہلی میں 853 روپے،کولکتہ میں 879 روپے، ممبئی میں852.50 روپئے، چنئی میں868.50 روپئے، لکھنؤ میں 890.50 روپئے، احمد آباد میں 860 روپے، حیدرآباد میں905 روپے، وارانسی میں 916.50 روپئے اور پٹنہ میں 951 روپے میں دستیاب ہوں گے۔ واضح رہے کہ سرکاری پٹرولیم مارکیٹنگ کمپنیاں ہر مہینے کی پہلی تاریخ کو ایل پی جی سلنڈر کی قیمتوں کا جائزہ لیتی ہیں۔ اس سے قبل جنوری میں 19 کلو کے کمرشیل گیس سلنڈر کی قیمت میں اضافہ کیا گیا تھا۔ پچھلے سال نومبر اور دسمبر میں ان سلنڈروں کی قیمتوں میں بالترتیب 5 اور 10 روپئے کی کمی کی گئی تھی۔

Source: social media